kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^7
1 Pas kësaj pashë katër engjëj që qëndronin në katër skajet e dheut, duke i mbajtur të katër erërat e dheut, që të mos frynte erë as mbi tokë, as në det, as në ndonjë pemë.
² Pashë një tjetër engjëll duke u ngjitur nga lindja e diellit, që kishte vulën e Perëndisë së gjallë. U thirri me zë të lartë katër engjëjve, të cilëve u ishte dhënë pushtet të bënin dëm në tokë e në det,
³ duke thënë: "Mos e dëmtoni tokën dhe detin, as pemët, derisa t’i vulosim në ballë shërbëtorët e Perëndisë sonë."
⁴ Dëgjova numrin e atyre që ishin vulosur, njëqind e dyzet e katër mijë, të vulosur prej çdo fisi të bijve të Izraelit:
⁵ nga fisi i Judës, dymbëdhjetë mijë të vulosur, nga fisi i Rubenit dymbëdhjetë mijë, nga fisi i Gadit dymbëdhjetë mijë,
⁶ nga fisi i Aserit dymbëdhjetë mijë, nga fisi i Neftalimit dymbëdhjetë mijë, nga fisi i Manaseut dymbëdhjetë mijë,
⁷ nga fisi i Simeonit dymbëdhjetë mijë, nga fisi i Levit dymbëdhjetë mijë, nga fisi i Isakarit dymbëdhjetë mijë,
⁸ nga fisi i Zebulunit dymbëdhjetë mijë, nga fisi i Jozefit dymbëdhjetë mijë, nga fisi i Beniaminit dymbëdhjetë mijë.
⁹ Pas kësaj vështrova, dhe ja, një turmë e madhe, që askush nuk mund ta numëronte, nga të gjitha kombet, fiset, popujt dhe gjuhët, po qëndronte përpara fronit dhe përpara Qengjit, veshur me rroba të bardha dhe me degë palmash në duar.
¹⁰ Thërrisnin me zë të lartë, duke thënë: "Shpëtimi i përket Perëndisë tonë që është ulur në fron, dhe Qengjit."
¹¹ Të gjithë engjëjt qëndronin rreth fronit dhe rreth pleqve e katër krijesave të gjalla. Ata ranë me fytyrë përdhe përpara fronit dhe adhuruan Perëndinë,
¹² duke thënë: "Amen, bekimi, lavdia, mençuria, falënderimi, nderi, fuqia dhe forca i qofshin Perëndisë sonë për jetë të jetëve. Amen."
¹³ Një nga pleqtë m’u përgjigj, duke më thënë: "Këta që janë veshur me rroba të bardha, kush janë dhe nga kanë ardhur?"
¹⁴ I thashë: "Im zot, ti e di." Ai më tha: "Këta janë ata që kanë dalë nga mundimi i madh, i lanë rrobat e veta dhe i bënë të bardha me gjakun e Qengjit.
¹⁵ Për këtë arsye ata janë përpara fronit të Perëndisë dhe i shërbejnë Atij ditë e natë në tempullin e Tij. Ai që është ulur në fron, do ta ngrejë tendën e Vet mbi ta.
¹⁶ Ata nuk do të kenë më uri, as etje. Dielli nuk do të godasë mbi ta, as ndonjë vapë përvëluese,
¹⁷ sepse Qengji në mes të fronit do të jetë bariu i tyre dhe do t’i çojë te burimet e ujërave të jetës. Perëndia do të fshijë çdo lot nga sytë e tyre."