kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^5
1 Në krahun e djathtë të Atij që ishte ulur në fron pashë një libër në trajtë rrotulle të shkruar brenda dhe jashtë, të vulosur me shtatë vula.
² Pashë një engjëll të fuqishëm duke shpallur me zë të lartë: "Kush është i denjë të hapë librin dhe t’i zgjidhë vulat?"
³ Askush në qiell, as në tokë, as nën tokë nuk mund të hapte librin, as të shihte në të.
⁴ Fillova të qaja me të madhe, sepse askush nuk u gjet i denjë që të hapte librin, as që të shihte brenda tij.
⁵ Një nga pleqtë më tha: "Mos qaj. Ja, luani nga fisi i Judës, Rrënja e Davidit, ia doli të hapë librin dhe të zgjidhë shtatë vulat e tij."
⁶ Pashë një Qengj, si të ishte i therur, duke qëndruar në mes të fronit, rrethuar nga të katër krijesat e gjalla dhe nga pleqtë. Ai kishte shtatë brirë dhe shtatë sy, që përfaqësojnë shtatë Frymët e Perëndisë, të dërguar në gjithë tokën.
⁷ Ai erdhi dhe mori librin nga dora e djathtë e Atij që ishte ulur në fron.
⁸ Kur mori librin, të katër krijesat e gjalla dhe të njëzet e katër pleqtë ranë përmbys përpara Qengjit. Secili kishte nga një harpë dhe mbanin kupa ari të mbushura me temjan, që janë lutjet e shenjtërve.
⁹ Kënduan një këngë të re, duke thënë: "I denjë je që të marrësh librin dhe të zgjidhësh vulat e tij, sepse Ti u there dhe me gjakun Tënd bleve për Perëndinë njerëz nga çdo fis, gjuhë, popull dhe komb.
¹⁰ I bëre ata mbretëri e priftërinj për Perëndinë tonë, të cilët do të mbretërojnë mbi tokë."
¹¹ Pastaj pashë dhe dëgjova zërin e shumë engjëjve rreth fronit, rreth krijesave të gjalla dhe rreth pleqve. Numri i tyre ishte dhjetëra e dhjetëra mijëra dhe mijëra mijërash,
¹² dhe thoshin me zë të lartë: "I denjë është Qengji i therrur që të marrë fuqinë, pasurinë, mençurinë, pushtetin, nderin, lavdinë dhe bekimin."
¹³ Çdo krijesë që është në qiell, mbi tokë, nën tokë dhe në det, si edhe gjithçka brenda tyre, e dëgjova duke thënë: "Atij që rri ulur në fron dhe Qengjit, i qofshin bekimi, nderi, lavdia, pushteti në jetë të jetëve."
¹⁴ Të katër krijesat e gjalla thoshin: "Amen." Pleqtë ranë përmbys dhe e adhuruan.