kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^4
1 Pas këtyre vështrova, dhe ja, një derë ishte e hapur në qiell dhe zëri i parë që dëgjova, kur më foli si trumbetë, tha: "Ngjitu këtu dhe do të të tregoj ato që duhet të ndodhin pas këtyre."
² Menjëherë u pushtova nga Fryma. Dhe ja, një fron qëndronte në qiell dhe Një që ishte ulur në të.
³ Ai që ishte ulur, në të parë i ngjante gurëve të çmueshëm të diasprit dhe të sardit. Fronin e rrethonte një ylber, që i ngjante në pamje smeraldit.
⁴ Rreth fronit ishin njëzet e katër frone të tjerë dhe mbi ta ishin ulur njëzet e katër pleq të veshur me rroba të bardha dhe mbi kokë kishin kurora prej ari.
⁵ Nga froni dilnin vetëtima, zëra dhe gjëmime rrufesh. Shtatë fenerë zjarri digjeshin përpara fronit, që përfaqësojnë shtatë Frymët e Perëndisë.
⁶ Përpara fronit ishte një si det i qelqtë, i qartë si kristali. Në mes të fronit dhe përreth tij ishin katër krijesa të gjalla të mbuluara me sy përpara dhe nga pas.
⁷ Krijesa e parë ishte si një luan, krijesa e dytë ishte si një viç, krijesa e tretë kishte fytyrë si të njeriut, krijesa e katërt i ngjante një shqiponje që fluturon.
⁸ Secila nga të katër krijesat e gjalla kishte gjashtë krahë dhe ishte e mbuluar me sy përreth dhe brenda. Nuk pushonin ditë e natë duke thënë: "I shenjtë, i shenjtë, i shenjtë është Zoti Perëndi, I gjithëfuqishmi, Ai që ishte, që është dhe që do të vijë."
⁹ Sa herë që krijesat e gjalla i japin lavdi, nder dhe e falënderojnë Atë që është ulur në fron, Atë që jeton në jetë të jetëve,
¹⁰ të njëzet e katër pleqtë bien përpara Atij që është ulur në fron, e adhurojnë Atë që jeton në jetë të jetëve dhe i hedhin kurora para fronit, duke thënë,
¹¹ "I denjë je, Zoti dhe Perëndia ynë, që të marrësh lavdinë, nderin dhe fuqinë, sepse Ti i ke krijuar të gjitha dhe nga vullneti Yt u krijuan dhe ekzistojnë ato."