kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^3
1 Engjëllit të kishës në Sardë shkruaji: Këto thotë Ai që ka shtatë frymët e Perëndisë dhe shtatë yjet: ‘I di veprat e tua; të dinë të gjallë, por je i vdekur.
² Zgjohu dhe forcoje atë që ka mbetur dhe që është gati për të vdekur, sepse nuk i gjeta të përsosura veprat e tua përpara Perëndisë.
³ Kujto pra, atë që ke marrë dhe ke dëgjuar. Ruaje dhe pendohu, sepse po nuk u zgjove, do të vij si vjedhës dhe nuk ke për ta marrë vesh se në ç’orë do të vij te ti.
⁴ Megjithatë ti ke disa njerëz në Sardë që nuk i kanë ndotur rrobat e tyre. Ata do të ecin me mua të veshur në të bardha, sepse janë të denjë për këtë.
⁵ Kështu, ai që del fitimtar, do të vishet me rroba të bardha. Nuk do t’ia fshij emrin nga libri i jetës dhe do t’ia pohoj emrin përpara Atit Tim dhe përpara engjëjve të Tij.
⁶ Ai që ka veshë, le të dëgjojë çfarë u thotë Fryma kishave.’
⁷ Engjëllit të kishës në Filadelfi shkruaji: Këto thotë i Shenjti, i Vërteti, Ai që mban çelësin e Davidit, Ai që çfarëdo që të hapë askush nuk mund ta mbyllë, Ai që çfarëdo që të mbyllë askush nuk mund ta hapë:
⁸ ‘I di veprat e tua. Ja, kam vënë para teje një derë të hapur, të cilën askush nuk mund ta mbyllë. E di që nuk ke shumë fuqi, por megjithatë e ke mbajtur fjalën Time dhe nuk e ke mohuar emrin Tim.
⁹ Ja, po të jap disa nga sinagoga e Satanit, që e quajnë veten judenj, megjithëse nuk janë, por gënjejnë – ata do t’i bëj të vijnë e të ulen në gjunjë para këmbëve të tua, që ta marrin vesh se Unë të kam dashur.
¹⁰ Meqë e ke mbajtur urdhërimin Tim të durimit, edhe Unë do të të ruaj nga ora e sprovës, që do të vijë mbi tërë botën për të vënë në provë ata që banojnë mbi tokë.
¹¹ Po vij shpejt. Mbaje fort atë që ke, që askush të mos ta heqë kurorën.
¹² Fitimtarin do ta bëj shtyllë në tempullin e Perëndisë Tim dhe nuk do të dalë më kurrë jashtë tempullit. Mbi të do të shkruaj emrin e Perëndisë Tim, emrin e qytetit të Perëndisë Tim, Jeruzalemin e ri, që zbret prej qielli nga Perëndia Im së bashku me emrin Tim të ri.
¹³ Ai që ka veshë, le të dëgjojë çfarë u thotë Fryma kishave.’
¹⁴ Engjëllit të kishës në Laodiki shkruaji: Këto thotë Ameni, Dëshmitari besnik dhe i vërtetë, Fillimi i krijimit të Perëndisë:
¹⁵ ‘I di veprat e tua; ti nuk je as i ftohtë as i ngrohtë. Do të desha të ishe i ngrohtë ose i ftohtë.
¹⁶ Kështu, meqë je i vakët, as i ngrohtë as i ftohtë, do të të vjell nga goja Ime.
¹⁷ Sepse thua: "Jam i pasur dhe kam vënë pasuri. Për asgjë nuk kam nevojë." Nuk e kupton se je i mjerë, për të ardhur keq, i varfër, i verbër dhe i zhveshur,
¹⁸ Po të këshilloj të blesh prej meje ar të kulluar me zjarr, që të pasurohesh, rroba të bardha, që të vishesh e të mos zbulohet lakuriqësia jote e turpshme, balsam për të lyer sytë që të shohësh.
¹⁹ Ata që i dua, unë i qortoj dhe i ndëshkoj. Prandaj ji i zellshëm dhe pendohu.
²⁰ Ja, po qëndroj te dera dhe po trokas. Po të ma dëgjojë dikush zërin dhe të hapë derën, do të hyj në shtëpinë e tij dhe do të ha darkë me të dhe ai me Mua.
²¹ Ai që del fitimtar, atë do ta ul me Mua në fronin Tim, siç dola edhe Unë fitimtar dhe u ula me Atin Tim në fronin e Tij.
²² Ai që ka veshë, le të dëgjojë çfarë u thotë Fryma kishave’."