kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^2
1 "Engjëllit të kishës në Efes shkruaji: Këto thotë Ai që mban shtatë yjet në dorën e Tij të djathtë, Ai që ecën në mes të shtatë shandanëve prej ari:
² ‘I di veprat e tua, mundin dhe ngulmimin tënd. E di që nuk mund t’i durosh të këqinjtë, që i vure në provë ata që i thonë vetes apostuj, por që nuk janë të tillë, dhe i pe se janë gënjeshtarë.
³ Me durim të madh vuajte për hir të emrit Tim dhe nuk je lodhur.
⁴ Por kam këtë si qortim për ty: e ke braktisur dashurinë tënde të parë.
⁵ Kujtohu pra, nga ke rënë. Pendohu dhe bëj veprat që ke bërë më parë. Përndryshe, po të mos pendohesh, do të vij tek ti dhe do ta heq shandanin tënd nga vendi.
⁶ Por këtë të mirë e ke, që urren veprat e nikolaitëve, të cilat i urrej edhe unë.
⁷ Ai që ka veshë, le të dëgjojë çfarë u thotë Fryma kishave. Atij që del fitimtar, do t’i japë të drejtën të hajë nga pema e jetës, që është në Parajsën e Perëndisë.’
⁸ Engjëllit të kishës në Smirnë shkruaji: Këto thotë i Pari dhe i Fundit, i cili ishte i vdekur dhe u kthye në jetë :
⁹ ‘E di mundimin dhe varfërinë tënde (megjithëse je i pasur); e di blasfeminë që të bënë ata që e quajnë veten judenj dhe nuk janë, por janë një sinagogë e Satanit.
¹⁰ Të mos kesh fare frikë për ato që do të vuash. Ja, djalli do t’i hedhë disa prej jush në burg për t’ju vënë në provë, dhe do të kaloni mundime për dhjetë ditë. Qëndro besnik deri në vdekje dhe do të të jap kurorën e jetës.
¹¹ Ai që ka veshë, le të dëgjojë çfarë u thotë Fryma kishave. Ai që del fitimtar, nuk do të dëmtohet nga vdekja e dytë.’
¹² Engjëllit të kishës në Pergam shkruaji: Këto thotë Ai që ka shpatën e mprehtë dytehëshe:
¹³ ‘E di ku banon, atje ku është froni i Satanit. Megjithatë ti mban fort emrin Tim dhe nuk e mohove besimin Tim edhe në ditët kur Antipa, dëshmitari Im besnik, u vra mes jush, atje ku banon Satani.
¹⁴ Por duhet të të qortoj për disa gjëra: atje te ti ke disa që i përmbahen mësimit të Balaamit, i cili e mësonte Balakun të joshte bijtë e Izraelit të binin në mëkat, duke ngrënë mishin që flijohej për idhujt dhe duke kryer vepra të përdala.
¹⁵ Po ashtu edhe ti ke disa që ndjekin doktrinën e nikolaitëve.
¹⁶ Pendohu pra! Përndryshe do të vij shpejt tek ti dhe do të bëj luftë kundër tyre me shpatën e gojës Sime.
¹⁷ Ai që ka veshë, le të dëgjojë çfarë u thotë Fryma kishave. Atij që del fitimtar, do t’i jap nga mana e fshehur. Do t’i jap një gur të bardhë me një emër të ri të shkruar mbi të, që askush nuk e di përveç atij që e merr.’
¹⁸ Engjëllit të kishës në Tiatirë shkruaji: Këto thotë Biri i Perëndisë, që sytë i ka si flakë zjarri dhe këmbët si bronz i praruar:
¹⁹ ‘I di veprat e tua, dashurinë, besimin, shërbimin dhe ngulmimin tënd. E di që veprat e tua të fundit janë më të shumta se të parat.
²⁰ Por këtë vërejtje kam për ty: e lejon Jezabelën, gruan që e quan veten profete, t’i mësojë dhe t’i mashtrojë shërbëtorët e mi, që ata të kryejnë vepra të përdala e të hanë nga mishi i flijuar për idhujt.
²¹ I dhashë asaj kohë të pendohet për jetën e saj të shthurur, por ajo nuk do që të pendohet.
²² Ja, atë do ta flak të dergjet në shtrat vuajtjesh dhe ata që bëjnë tradhti bashkëshortore me të, do t’i bëj të vuajnë, po të mos pendohen për veprat e saj.
²³ Fëmijët e saj do t’i godas për vdekje dhe të gjitha kishat do ta marrin vesh që unë jam Ai që heton mendjet dhe zemrat dhe secilit prej jush do t’i jap sipas veprave të tij.
²⁴ Po ju them juve, pjesës tjetër që është në Tiatirë, juve që nuk e ndiqni mësimin e saj, që nuk i keni njohur të ashtuquajturat sekrete të thella të Satanit: nuk po ju vë barrë tjetër,
²⁵ por atë që keni, mbajeni fort derisa të vij Unë.
²⁶ Atij që del fitimtar dhe atij që bën deri në fund vullnetin Tim do t’i jap pushtet mbi kombet –
²⁷ ai do t’i sundojë si bariu me shkop hekuri dhe do t’i copëtojë si enë balte – me të njëjtin pushtet që kam marrë edhe unë prej Atit Tim;
²⁸ dhe do t’i jap atij yllin e mëngjesit.
²⁹ Ai që ka veshë, le të dëgjojë çfarë u thotë Fryma kishave.’