kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^19
1 Pas këtyre dëgjova një si zë të fortë prej një turme të madhe në qiell, që thoshte: "Aleluja! Shpëtimi, lavdia dhe fuqia janë të Perëndisë sonë,
² sepse të vërteta dhe të drejta janë gjykimet e Tij. Ai ka gjykuar gruan e përdalë me nam që prishi botën me kurvërinë e saj dhe ka marrë hak për gjakun e shërbëtorëve të Tij të derdhur prej dorës së saj."
³ Përsëri thirrën: "Aleluja! Tymi prej saj po ngrihet lart në jetë të jetëve."
⁴ Të njëzet e katër pleqtë dhe katër krijesat e gjalla ranë përmbys dhe adhuruan Perëndinë që ishte ulur në fron, duke thënë: "Amen. Aleluja!"
⁵ Një zë doli nga froni, duke thënë: "Lëvdoni Perëndinë tonë, të gjithë ju shërbëtorët e Tij, [dhe] ju, të vegjël e të mëdhenj, që e keni frikë Atë."
⁶ Dëgjova një si zë prej një turme të madhe, si gurgullimë ujërash që vërshojnë dhe si gjëmim bubullimash të forta, që thoshte: "Aleluja! Sepse Zoti Perëndia [ynë], i Gjithëfuqishmi, mbretëron.
⁷ "Le të gëzohemi e të ngazëllohemi dhe le t’ia japin lavdinë Atij, sepse dita e dasmës së Qengjit ka ardhur dhe nusja e Tij është bërë gati."
⁸ I kanë dhënë të veshë një pëlhurë të hollë liri, të ndritshme dhe të pastër, sepse pëlhura e hollë e lirit përfaqëson veprat e drejta të shenjtërve.
⁹ Atëherë engjëlli më tha: "Shkruaj: ‘Lum ata që janë ftuar në darkën e dasmës së Qengjit.’" Pastaj më tha: "Këto janë fjalët e vërteta të Perëndisë."
¹⁰ I rashë para këmbëve për ta adhuruar, por ai më tha: "Shiko se mos e bën këtë. Unë jam shërbëtor bashkë me ty dhe me vëllezërit e tu që japin dëshmi për Jezusin. Adhuro Perëndinë! Sepse dëshmia e Jezusit është fryma e profecisë."
¹¹ Pastaj pashë qiellin të hapur dhe ja, para meje ishte një kalë i bardhë. Ai që i kishte hipur, quhet Besniku dhe i Vërteti; me drejtësi gjykon dhe bën luftë ai.
¹² Sytë i ka si flakë zjarri dhe mbi kokë ka shumë kurora mbretërore. Ka të shkruar një emër, të cilin askush veç Tij nuk e di.
¹³ Është i veshur me një rrobë të ngjyer në gjak dhe emri i Tij është Fjala e Perëndisë.
¹⁴ Ushtritë e qiellit, të veshura me rroba të linjta, të bardha e të pastra, e ndiqnin hipur mbi kuaj të bardhë.
¹⁵ Prej gojës së Tij del një shpatë e mprehtë, me të cilën godet kombet; Ai do t’i qeverisë ato si bariu me shkop hekuri; Ai e shkel vençën e zemërimit të furishëm të Perëndisë së Gjithëfuqishëm.
¹⁶ Mbi rrobë dhe në kofshë ka të shkruar një emër: "MBRET I MBRETËRVE DHE ZOT I ZOTËRVE."
¹⁷ Pastaj pashë një engjëll duke qëndruar në diell, i cili u thirri me zë të lartë të gjithë shpendëve që fluturojnë në mes të qiellit: "Ejani, mblidhuni për darkën e madhe të Perëndisë,
¹⁸ që të hani mish mbretërish, mish komandantësh, mish njerëzish të fuqishëm, mish kuajsh dhe kalorësish, si edhe mish njerëzish të lirë e skllevër, të vegjël e të mëdhenj."
¹⁹ Atëherë pashë bishën dhe mbretërit e dheut me ushtritë e tyre, të mbledhur për të bërë luftë kundër Atij që ishte hipur mbi kalë dhe kundër ushtrisë së Tij.
²⁰ Bisha u kap bashkë me profetët e rremë që kishin bërë shenjat para syve të saj. Me këto shenja ajo mashtroi ata që kishin marrë damkën e bishës dhe ata që kishin adhuruar statujën e saj; të dy u flakën të gjallë në liqenin e zjarrtë që digjet me squfur.
²¹ Pjesa tjetër u vra me shpatën që doli prej gojës së Atij që ishte hipur mbi kalë dhe të gjithë shpendët u ngopën me mishin e tyre.