kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^18
1 Pas këtyre gjërave pashë një engjëll tjetër duke zbritur nga qielli. Ai kishte pushtet të madh, dhe toka u ndriçua nga lavdia e tij.
² Ai thirri me zë të lartë, duke thënë: "Ra, ra Babilonia e madhe! Është bërë një banesë demonësh, strofkë për çdo frymë të papastër, strofkë për çdo shpend të ndotur, dhe strofkë për çdo bishë të fëlliqur dhe të neveritshme.
³ Sepse të gjitha kombet kanë pirë nga vera e dufit të kurvërisë së saj; mbretërit e dheut kanë kurvëruar bashkë me të; tregtarët e dheut janë pasuruar nga luksi i saj i tepërt."
⁴ Dëgjova një zë tjetër nga qielli, që thoshte: "Dil prej saj, o populli im, që të mos bëhesh pjesëtar në mëkatet e saj dhe të mos marrësh ndonjë prej murtajave të saj,
⁵ sepse mëkatet e saj janë bërë pirg deri në qiell dhe Perëndia i kujton paudhësitë e saj.
⁶ Kthejani asaj ashtu siç ju shpërbleu ajo dhe paguajani dyfish për ato që ka bërë. Përgatisni dyfish për të nga kupa që ajo ka përzier për ju.
⁷ Gjithë sa ka shpenzuar për lavdinë dhe jetën e saj të shthurur, kthejani me po aq mundim dhe pikëllim, sepse në zemrën e vet thotë: ‘Ulem si mbretëreshë; nuk jam vejushë dhe nuk do të mbaj kurrë zi.’
⁸ Prandaj brenda një dite mbi të do të bien murtaja të tilla si: vdekje, vajtim dhe zi buke. Ajo do të bëhet shkrumb në zjarr, sepse i fuqishëm është Zoti Perëndi që e gjykon atë.
⁹ Mbretërit e dheut, që kanë kurvëruar dhe kanë bërë jetë të shthurur me të, do ta qajnë dhe do ta vajtojnë kur të shohin tymin e zjarrit ku digjet ajo.
¹⁰ Të tmerruar nga mundimet e saj, ata do të qëndrojnë larg, duke thënë: ‘Mjerë, mjerë o qytet i madh i Babilonisë, o qytet i fuqishëm! Brenda një ore të erdhi gjykimi.’
¹¹ Tregtarët e dheut qajnë dhe mbajnë zi për të, sepse askush nuk ua blen më mallin,
¹² sende prej ari e argjendi, gurë të çmuar, margaritarë, pëlhura të linjta, purpur, mëndafsh i kuq flakë dhe çdo lloj druri i shtrenjtë, çdo lloj ene prej fildishi e druri të çmuar, bronz, hekur e mermer,
¹³ kanellë, parfum, temjan, mirrë, livando, verë, vaj ulliri, miell i imët, grurë, gjedh e dhen, kuaj e qerre, skllevër dhe shpirtra njerëzish.
¹⁴ Fryti që ta donte shpirti, të ka ikur, dhe të gjitha gjërat e kamura e të ndritshme të humbën, për të mos i gjetur më kurrë.
¹⁵ Tregtarët, që u pasuruan prej saj me këto, do të qëndrojnë larg të tmerruar prej mundimit të saj, duke qarë e duke mbajtur zi.
¹⁶ Do të thonë: ‘Mjerë, mjerë qyteti i madh, ai që u vesh me të linjta, të purpurta e të kuqe të ndezur, që u stolis me ar, me gurë të çmuar dhe me margaritarë.
¹⁷ Brenda një ore u shkretua gjithë kjo pasuri! Çdo kapiten anijeje, çdo udhëtar, çdo detar dhe të gjithë ata që sigurojnë jetesën prej detit, do të qëndrojnë larg
¹⁸ dhe, kur të shohin tymin e zjarrit të saj, do të thërrasin: ‘A ka qytet që t’i ngjajë qytetit të madh?’
¹⁹ Do të hedhin pluhur mbi kokë dhe do të thërrasin, duke qarë e duke vajtuar: ‘Mjerë, mjerë qyteti i madh, ku të gjithë ata që kishin anije në det, u pasuruan prej begatisë së tij. Brenda një ore u shkretua!’
²⁰ Gëzohu për të, o qiell! Ngazëlleni dhe ju o shenjtër, apostuj dhe profetë, sepse Perëndia ia dha gjykimin për ato që ju ka bërë."
²¹ Një engjëll i fortë mori një gur, sa një gur të madh mulliri, e hodhi në det dhe tha: "Kështu, me forcë të tillë, do të hidhet Babilonia, qyteti i madh për të mos u gjetur më.
²² Zëri i harpistëve, i muzikantëve, i fyelltarëve dhe i trumbetarëve nuk do të dëgjohet më tek ti; asnjë mjeshtër i çfarëdo zanati nuk do të gjendet më tek ti; zhurma e gurit të mullirit nuk do të dëgjohet më tek ti;
²³ dritë llambe nuk do të ndriçojë më tek ti; zëri i dhëndrit dhe i nuses nuk do të dëgjohet më tek ti. Tregtarët e tu ishin të mëdhenjtë e dheut. Të gjitha kombet u mashtruan me magjinë tënde.
²⁴ Në të u gjet gjaku i profetëve, i shenjtërve dhe i të gjithë atyre që janë therur mbi tokë."