kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^11
1 Pastaj m’u dha një kallam që i ngjante një shkopi matës, duke më thënë: "Ngrihu e mat tempullin e Perëndisë e altarin dhe numëroji ata që adhurojnë në të.
² Por oborrin që është jashtë tempullit mos e mat, sepse është lënë në dorë të kombeve, të cilët do ta shkelin me këmbë qytetin e shenjtë për dyzet e dy muaj.
³ Do t’u jap pushtet dy dëshmitarëve të mi dhe ata do të profetizojnë për një mijë e dyqind e gjashtëdhjetë ditë, të veshur me thasë."
⁴ Këta janë dy ullinjtë dhe dy shandanët që qëndrojnë përpara Zotit të dheut.
⁵ Po të dojë njeri t’i dëmtojë, prej gojës së tyre del zjarr dhe i përpin armiqtë e tyre. Kështu duhet të vritet kushdo që kërkon t’i dëmtojë.
⁶ Këta kanë pushtet të mbyllin qiellin, që të mos bjerë shi në ditët e profecisë së tyre; ata kanë pushet t’i kthejnë ujërat në gjak dhe të godasin tokën me çdo lloj murtaje, sa herë që të duan.
⁷ Kur të kenë mbaruar dëshminë e tyre, bisha që ngrihet nga humnera do të përleshet me ta, do t’i mundë dhe do t’i vrasë.
⁸ Kufomat e tyre do të dergjen në rrugën e qytetit të madh, që në mënyrë të figurshme quhet Sodomë dhe Egjipt, ku u kryqëzua edhe Zoti i tyre.
⁹ Njerëz nga të gjithë popujt, fiset, gjuhët dhe kombet do t’i shohin kufomat e tyre për tri ditë e gjysmë dhe nuk do të lejojnë që kufomat e tyre të futen në varr.
¹⁰ Ata që banojnë në tokë, do të gëzohen për ta dhe do të bëjnë festë; do t’i dërgojnë dhurata njëri-tjetrit, sepse këta dy profetë torturuan ata që banojnë në tokë.
¹¹ Pas tri ditësh e gjysmë tek ata hyri fryma e jetës nga Perëndia dhe ata qëndruan në këmbë. Një frikë e madhe i pushtoi ata që i shikonin.
¹² Dëgjuan një zë të lartë nga qielli, që u thoshte: "Ngjituni këtu." Ata u ngjitën në qiell në një re dhe armiqtë e tyre i panë.
¹³ Në atë orë ra një tërmet i madh dhe një e dhjeta e qytetit u shemb; shtatë mijë njerëz mbetën të vrarë nga tërmeti. Pjesa tjetër u tmerrua dhe i dha lavdi Perëndisë së qiellit.
¹⁴ Vajmediti i dytë shkoi. Ja, vajmedeti i tretë po vjen shpejt.
¹⁵ Engjëlli i shtatë i ra trumbetës; zëra të fortë u dëgjuan në qiell, që thoshin: "Mbretëria e botës është bërë mbretëri e Zotit tonë dhe e Krishtit të Tij dhe Ai do të mbretërojë në jetë të jetëve."
¹⁶ Të njëzet e katër pleqtë, që ishin ulur në fronet e tyre përpara Perëndisë, ranë me fytyrë përdhe dhe adhuruan Perëndinë,
¹⁷ duke thënë: "Të falënderojmë Ty, o Zot Perëndi, i Gjithëfuqishmi, që je dhe që ishe, sepse Ti e more fuqinë Tënde të madhe dhe ke filluar të mbretërosh.
¹⁸ Kombet u zemëruan dhe zemërimi Yt erdhi. Ka ardhur koha për gjykimin e të vdekurve dhe për t’u dhënë shpërblimin shërbëtorëve të Tu, profetëve, shenjtërve dhe atyre që kanë frikë emrin Tënd, të vegjël e të mëdhenj, dhe për të shkatërruar ata që shkatërrojnë tokën."
¹⁹ U hap tempulli i Perëndisë në qiell dhe brenda tempullit u shfaq arka e besëlidhjes së Tij. Dhe erdhën vetëtima, buçima, bubullima, tërmet dhe një stuhi e madhe breshri.