kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22

Zbulesa

^1
1 Zbulesa e Jezus Krishtit, të cilën Perëndia ia dha për t’ua treguar shërbëtorëve të Tij ato që duhet të ndodhin së shpejti, dhe Ai e bëri të ditur duke i dërguar engjëllin shërbëtorit të Tij Gjon,
² i cili ka dëshmuar për të gjitha ato që ka parë, domethënë për fjalën e Perëndisë dhe për dëshminë e Jezus Krishtit.
³ I bekuar është ai që i lexon dhe ata që i dëgjojnë fjalët e kësaj profecie dhe që i ruajnë ato që janë shkruar në të, sepse koha është afër.
⁴ Gjoni, shtatë kishave që janë në Azi: Hir dhe paqe paçi prej Atij që është, që ishte dhe që do të vijë, nga të shtatë frymët që janë përpara fronit të Tij
⁵ dhe nga Jezus Krishti, dëshmitari besnik, i parëlinduri nga të vdekurit dhe sunduesi i mbretërve të dheut. Atij që na do, që na çliroi nga mëkatet tona me gjakun e Vet
⁶ dhe që na ka bërë mbretëri e priftërinj për t’i shërbyer Perëndisë dhe Atit, Atij i qoftë lavdia dhe pushteti në jetë të jetëve. Amen.
⁷ Ja, Ai po vjen me retë. Çdo sy do ta shohë, madje edhe ata që e shpuan. Të gjitha fiset e dheut do të vajtojnë mbi Të. Ashtu qoftë! Amen.
⁸ "Unë jam Alfa dhe Omega", thotë Zoti Perëndi: "Ai që është, që ishte dhe që do të vijë, i Gjithëfuqishmi."
⁹ Unë, Gjoni, vëllai juaj dhe pjesëmarrës bashkë me ju në mundimin, mbretërinë dhe durimin që janë në Jezusin, isha në ishullin që quhej Patmos, për shkak të fjalës së Perëndisë dhe të dëshmisë së Jezusit.
¹⁰ Në ditën e Zotit, Fryma më pushtoi dhe dëgjova prapa meje një zë të lartë si zë trumbete,
¹¹ që thoshte: "Shkruaji në një libër ato që sheh dhe dërgojua shtatë kishave: në Efes, në Smirnë, në Pergam, në Tiatirë, në Sardë, në Filadelfi dhe në Laodiki."
¹² U ktheva të shoh zërin që po më fliste. Me t’u kthyer, pashë shtatë shandanë ari
¹³ dhe në mes të shandanëve një si bir njeriu, të veshur me një rrobë të gjatë deri te këmbët dhe me një brez të artë ngjeshur rreth kraharorit.
¹⁴ Flokët i kishte të bardhë, si lesh i bardhë si bora, sytë i flakëronin si zjarri;
¹⁵ këmbët i kishte si bronz i shndritshëm, si të ishin derdhur në furrën e përflakur, dhe zërin si gurgullimë që del prej ujërave vërshues.
¹⁶ Në dorën e djathtë mbante shtatë yje; nga goja i dilte një shpatë e mprehtë dytehëshe, dhe fytyra i ngjante diellit që ndriçon me gjithë shkëlqimin e vet.
¹⁷ Kur e pashë, rashë në këmbët e Tij si i vdekur. Ai vuri dorën e djathtë mbi mua, duke thënë: "Mos u frikëso. Unë jam i Pari dhe i Fundit.
¹⁸ Unë jam i Gjalli. Isha i vdekur dhe ja, jam i gjallë për jetë të jetëve. Unë i mbaj çelësat e vdekjes dhe të ferrit.
¹⁹ Shkruaji pra, ato që ke parë, ato që janë dhe ato që kanë për të ndodhur më pas.
²⁰ Misteri i shtatë yjeve që pe në të djathtën Time dhe i shtatë shandanëve prej ari është ky: shtatë yjet janë engjëjt e shtatë kishave dhe shtatë shandanët janë shtatë kishat."