3
¹ Pjetri dhe Gjoni po ngjiteshin për në tempull në orën e nëntë, që ishte ora e lutjes.
² Sollën aty një njeri që kishte lindur i çalë, të cilin e vinin çdo ditë te porta e tempullit e quajtur ‘E Bukura’, për t’u kërkuar lëmoshë atyre që hynin në tempull.
³ Ai, kur pa Pjetrin dhe Gjonin që po hynin në tempull, filloi të lypte për të marrë lëmoshë prej tyre.
⁴ Pjetri ia nguli sytë, po ashtu edhe Gjoni, dhe i tha: "Na shiko!"
⁵ Ai po i shikonte me vëmendje, duke shpresuar të merrte ndonjë gjë prej tyre.
⁶ Por Pjetri i tha: "Argjend dhe ar nuk kam, por atë që kam, po ta jap: ‘Në emër të Jezus Krishtit nazaretas [ngrihu] dhe ec!’"
⁷ Si e kapi nga dora e djathtë, e ngriti; menjëherë atij iu forcuan këmbët dhe kyçet.
⁸ Me një të hovur ai u ngrit më këmbë dhe filloi të lëvizte dhe hyri bashkë me ta në tempull duke ecur, duke kërcyer dhe duke lëvduar Perëndinë.
⁹ I gjithë populli e pa duke ecur dhe duke lëvduar Perëndinë
¹⁰ dhe e njohën që ishte ai që rrinte ulur duke kërkuar lëmoshë para Portës së Bukur të tempullit dhe u mahnitën e u çuditën për atë që i kishte ndodhur.
¹¹ Ndërsa ai nuk po i ndahej Pjetrit dhe Gjonit, i gjithë populli u turr i mrekulluar drejt tyre te vendi që quhej portiku i Solomonit.
¹² Kur Pjetri e pa këtë, iu përgjigj popullit: "O burra të Izraelit, përse po mrekulloheni me këtë? Përse na i keni ngulur sytë sikur ta kishim bërë ne këtë njeri të ecë me fuqinë apo me përshpirtshmërinë tonë?
¹³ Perëndia i Abrahamit, [Perëndia] i Isakut, [Perëndia] i Jakobit, Perëndia i etërve tanë, i ka dhënë lavdi shërbëtorit të Vet Jezus, të cilin ju e dorëzuat për ta vrarë dhe e mohuat para Pilatit, megjithëse ai e pa të udhës që ta lironte.
¹⁴ Por ju mohuat të Shenjtin dhe të Drejtin dhe kërkuat që t’ju jepej një vrasës.
¹⁵ Ju vratë Princin e jetës, të cilin Perëndia e ngjalli prej të vdekurve dhe për këtë ne jemi dëshmitarë.
¹⁶ Nëpërmjet besimit në emrin e Tij u bë i fortë ky që e shikoni dhe e njihni. Është emri i Jezusit dhe besimi që vjen nëpërmjet Tij ai që i dha këtë shëndet të plotë në prani të të gjithëve.
¹⁷ Dhe tani vëllezër, e di që keni vepruar nga padija, ashtu si edhe krerët tuaj.
¹⁸ Por kështu i përmbushi Perëndia ato që ka parathënë me gojën e të gjithë profetëve se Krishti i Tij do të vuante.
¹⁹ Prandaj pendohuni dhe kthehuni te Perëndia, që t’ju shlyhen mëkatet,
²⁰ që të vijnë kohë freskimi nga prania e Zotit dhe që Ai të dërgojë Krishtin e caktuar që më parë për ju, Jezusin,
²¹ të cilin qielli duhet ta mbajë deri në kohët e ripërtëritjes së të gjitha atyre për të cilat ka folur Perëndia që në fillim me anë të gojës së profetëve të Vet të shenjtë.
²² Moisiu tha: ‘Zoti, Perëndia juaj do t’ju ngrejë një profet si unë prej vëllezërve tuaj; ta dëgjoni për gjithçka që do t’ju flasë.
²³ Dhe çdo shpirt, që nuk do ta dëgjojë atë profet, do të zhduket nga populli.’
²⁴ Vërtet, të gjithë profetët, nga Samueli e këtej, të gjithë sa kanë folur, gjithashtu i kanë shpallur këto ditë.
²⁵ Ju jeni bijtë e profetëve dhe të besëlidhjes që bëri Perëndia me etërit tuaj, duke i thënë Abrahamit: ‘Nëpërmjet pasardhësve të tu do të bekohen të gjitha kombet e dheut.’
²⁶ Perëndia e ngjalli Shërbëtorin e Vet për ju më së pari, dhe e dërgoi për t’ju bekuar, duke e kthyer secilin prej jush nga rrugët tuaja të liga."