26
¹ Agripa i tha Palit: "Ke leje të flasësh për veten tënde." Atëherë Pali zgjati dorën dhe filloi të paraqesë mbrojtjen e vet.
² "Për sa u përket të gjitha akuzave që më ngrenë judenjtë, o mbret Agripë, e quaj veten të lumtur që po e paraqes sot para jush mbrojtjen time,
³ për më tepër që ti je i njeh të gjitha zakonet dhe çështjet ndër judenjtë; prandaj, të lutem, të më dëgjosh me durim.
⁴ Kështu pra, të gjithë judenjtë e dinë si kam rrojtur që në rini, duke e kaluar jetën, që prej fillimit, midis kombit tim dhe në Jeruzalem.
⁵ Ata më kanë njohur prej kohësh dhe mund të dëshmojnë, po të duan, që kam jetuar si farize, sipas sektit më të rreptë të fesë sonë.
⁶ Dhe tani qëndroj para gjyqit për shpresën e premtimit që Perëndia u dha etërve tanë,
⁷ premtim të cilin dymbëdhjetë fiset tona, duke i shërbyer me zell Perëndisë natë e ditë, shpresojnë ta arrijnë; për këtë shpresë, o mbret, po më akuzojnë judenjtë.
⁸ Përse ju duket e pabesueshme që Perëndia ngjall të vdekurit?
⁹ Kështu pra, unë mendoja me veten time se duhet të bëja ç’të mundja kundër emrit të Jezusit të Nazaretit.
¹⁰ Dhe pikërisht këtë kam bërë në Jeruzalem. Pasi m’u dha pushtet nga kryepriftërinjtë, mbylla në burg shumë nga shenjtërit dhe, kur i vrisnin, unë jepja votën time kundër tyre.
¹¹ Shpeshherë, në çdo sinagogë që i ndëshkoja, i detyroja të blasfemonin. Aq shumë egërsohesha me ta, saqë i përndiqja madje deri në qytetet e huaja.
¹² Njëherë, kur udhëtoja për në Damask, me pushtet e porosi të kryepriftërinjve,
¹³ në mesditë, pashë gjatë rrugës, o mbret, një dritë nga qielli, më të ndritshme se dielli, që vetëtinte rreth meje dhe atyre që udhëtonin me mua.
¹⁴ Ramë të gjithë përtokë dhe unë dëgjova një zë që më thoshte në dialektin hebraisht: ‘Saul, Saul, përse më përndjek? E ke të vështirë t’u biesh me shkelm thumbave të hostenit."
¹⁵ Unë thashë: ‘Kush je Ti, o Zot?’ dhe Zoti tha: ‘Unë jam Jezusi, që ti po e përndjek.
¹⁶ Por ngrihu dhe qëndro më këmbë, sepse prandaj t’u shfaqa, për të të caktuar shërbyes dhe dëshmitar të gjërave që ke parë [për Mua] dhe për ato që do të të tregoj.
¹⁷ Do të të çliroj nga populli yt dhe nga kombet, te të cilat Unë po të dërgoj
¹⁸ që t’u hapësh sytë, të kthehen nga errësira në dritë dhe nga pushteti i Satanit te Perëndia, të gëzojnë faljen e mëkateve dhe të trashëgojnë një vend bashkë me ata që janë shenjtëruar me anë të besimit në Mua.’
¹⁹ Kështu pra, o mbret Agripë, nuk u tregova i pabindur ndaj vegimit qiellor,
²⁰ por vazhdova t’u predikoj më parë atyre në Damask, në Jeruzalem dhe në gjithë krahinën e Judesë, si edhe kombeve, që të pendohen dhe të kthehen te Perëndia, duke kryer vepra të denja pendimi.
²¹ Për këto më kapën judenjtë në tempull dhe u përpoqën të më vrasin.
²² Pra, me ndihmën e Perëndisë, po qëndroj deri në këtë ditë duke i dhënë dëshmi të madhit e të voglit dhe nuk them asgjë tjetër veç atyre që kanë folur profetët dhe Moisiu se do të ndodhin:
²³ që Krishti duhej të vuante dhe, meqë ishte i pari që u ngjall prej të vdekurve, Ai do t’u shpallte dritën si popullit ashtu dhe kombeve."
²⁴ Ndërsa Pali mbronte veten duke thënë këto gjëra, Festi tha me zë të lartë: "Ti ke luajtur mendsh, o Pal! Studimet e shumta të kanë bërë të marrë."
²⁵ Por Pali tha: "Nuk kam luajtur mendsh, fort i shkëlqyeri Fest, por po flas fjalë të vërteta dhe plot kuptim.
²⁶ Sepse mbreti, të cilit po ashtu po i flas hapur, ka dijeni për këto punë. Jam i bindur se atij nuk i shpëton asgjë nga këto gjëra, sepse kjo nuk është bërë në fshehtësi.
²⁷ A i beson profetët, o mbret Agripë? E di që i beson."
²⁸ Agripa i tha Palit: "Për pak edhe mua do të më bindësh të bëhem i krishter."
²⁹ Pali tha: "Dashtë Perëndia, që shpejt a vonë, jo vetëm ti, por edhe të gjithë ata që po më dëgjojnë sot, të bëhen të tillë, ashtu siç jam edhe unë, por pa këto pranga."
³⁰ Mbreti, guvernatori dhe Bernika, si edhe ata që ishin ulur bashkë me ta, u ngritën.
³¹ Duke u larguar, filluan të flisnin me njëri-tjetrin e thoshin: "Ky njeri nuk po bën ndonjë gjë që të meritojë vdekjen ose prangat."
³² Agripa i tha Festit: "Ky njeri mund të ishte liruar, po të mos kishte kërkuar të gjykohej nga Cezari."