18
¹ Pas këtyre ngjarjeve Pali u largua nga Athina dhe shkoi në Korint.
² Aty gjeti një jude me emrin Akuila, lindur në Pont, që kishte ardhur rishtas nga Italia me të shoqen Priskilën, sepse Klaudi kishte urdhëruar që të gjithë judenjtë të largoheshin nga Roma. Pali shkoi tek ata.
³ Meqë kishin të njëjtën mjeshtëri, tendabërës, ai qëndroi me ta dhe filloi të punonte.
⁴ Çdo të shtunë diskutonte në sinagogë dhe përpiqej t’i bindte judenjtë dhe grekët.
⁵ Por kur Sila dhe Timoteu erdhën nga Maqedonia, Pali i ishte përkushtuar i tëri fjalës, duke u dëshmuar judenjve se Jezusi është Krishti.
⁶ Meqë ata e kundërshtonin dhe blasfemonin, ai shkundi rrobat dhe u tha: "Gjaku juaj rëntë mbi kokën tuaj! Unë jam i pastër. Që tani e tutje do të shkoj te kombet."
⁷ Me t’u laguar prej andej, shkoi në shtëpinë e një njeriu me emrin Titus Justi, një adhurues i Perëndisë, që e kishte shtëpinë ngjitur me sinagogën.
⁸ Krispi, kreu i sinagogës, bashkë me tërë shtëpinë e vet besuan në Zotin; shumë prej korintasve, pasi e dëgjuan, filluan të besojnë dhe të pagëzohen.
⁹ Zoti i tha Palit natën në një vegim: "Mos ki frikë, por fol dhe mos hesht,
¹⁰ sepse Unë jam me ty dhe askush nuk do të vërë dorë mbi ty për të të bërë keq, sepse kam shumë njerëz në këtë qytet."
¹¹ Atje qëndroi një vit e gjashtë muaj, duke u mësuar atyre fjalën e Perëndisë.
¹² Kur Galioni ishte prokonsull i Akaisë, të gjithë judenjtë, pa përjashtim, u ngritën kundër Palit dhe e çuan para gjyqit,
¹³ duke thënë: "Ky, në kundërshtim me ligjin, i bind njerëzit që të adhurojnë Perëndinë."
¹⁴ Por kur Pali ishte gati për të folur, Galioni u tha judenjve: "Po të ishte ndonjë padrejtësi apo keqbërje, o judenj, do t’ju dëgjoja me durim, siç është e arsyeshme,
¹⁵ por po të jetë çështje fjalësh apo emrash ose që lidhet me ligjin tuaj, shikojeni ju vetë këtë punë; unë nuk kam ndër mend të jem gjykatës për këto gjëra."
¹⁶ Dhe i largoi nga gjyqi.
¹⁷ Ata të gjithë kapën Sostenin, kreun e sinagogës, dhe filluan ta rrahin përpara gjyqit. Galioni nuk shqetësohej fare për asnjë nga këto punë.
¹⁸ Pali, pasi qëndroi atje edhe shumë ditë, u tha lamtumirë vëllezërve dhe mori udhën me anije për në Siri. Me të ishin Priskila dhe Akuila. Qethi kokën në Kenkrea, sepse kishte lidhur një kusht.
¹⁹ Arritën në Efes, ku Pali la Priskilën dhe Akuilën. Ai vetë hyri në sinagogë dhe nisi një diskutim me judenjtë.
²⁰ Kur i kërkuan që të qëndronte për një kohë më të gjatë, ai nuk pranoi,
²¹ por u përshëndet me ta, duke thënë: "Do të kthehem përsëri te ju, në dashtë Perëndia", dhe u nis me anije nga Efesi.
²² Si arriti në Cezare, u ngjit në Jeruzalem për të përshendetur kishën, dhe pastaj zbriti në Antioki.
²³ Si kaloi njëfarë kohe atje, u largua dhe përshkoi me radhë vendin e Galacisë dhe të Frigjisë, duke u dhënë forcë të gjithë dishepujve.
²⁴ Ndërkohë një jude me emrin Apolon, i lindur në Aleksandri, erdhi në Efes. Ai ishte njeri i gojës dhe i njihte fort mirë Shkrimet.
²⁵ Kishte marrë mësime në rrugën e Zotit dhe fliste plot zell e u mësonte njerëzve me saktësi gjërat për Jezusin, megjithëse njihte vetëm pagëzimin e Gjonit.
²⁶ Ai filloi të fliste hapur në sinagogë. Por kur e dëgjuan Priskila dhe Akuila, e morën mënjanë dhe ia shtjelluan më saktë rrugën e Perëndisë.
²⁷ Kur ai deshi të kalonte në Akai, vëllezërit i dhanë zemër dhe u shkruan dishepujve që ta prisnin. Si arriti, ai u dha ndihmë të madhe atyre që kishin besuar nëpërmjet hirit.
²⁸ Sepse ai i kundërshtonte me forcë judenjtë, duke treguar nëpërmjet Shkrimeve se Jezusi është Krishti.