12
¹ Në atë kohë mbreti Herod zuri disa veta, që i përkisnin kishës, dhe kishte ndër mend t’i keqtrajtonte.
² Vrau me shpatë Jakobin, vëllanë e Gjonit,
³ dhe, kur e pa që kjo u pëlqente judenjve, shkoi më tej duke arrestuar edhe Pjetrin. Kjo ndodhi kur ishin ditët e Bukës së Ndorme.
⁴ Si e arrestoi, e futi në burg dhe ua dorëzoi katër skuadrave me nga katër ushtarë që ta ruanin. Kishte ndër mend që, pas Pashkëve, ta nxirrte përpara popullit për gjyq publik.
⁵ Pjetrin pra, po e mbanin në burg, por kisha i lutej pa pushim Perëndisë për të.
⁶ Po atë natë, kur Herodi do ta nxirrte para popullit, Pjetri ishte duke fjetur midis dy ushtarëve, i lidhur me dy vargonj dhe me rojat para portës, që ruanin burgun.
⁷ Dhe ja, një engjëll i Zotit erdhi aty pranë dhe një dritë shkëlqeu në qeli; i ra Pjetrit në ije dhe e ngriti, duke thënë: "Ngrihu shpejt!" Dhe vargonjtë i ranë nga duart.
⁸ Engjëlli i tha: "Vër brezin dhe lidh sandalet", dhe ai ashtu bëri. Pastaj i tha: "Hidh rrobën përsipër dhe më ndiq."
⁹ Ai doli nga burgu duke i shkuar pas, por nuk e dinte se ajo që po bënte engjëlli, po ndodhte vërtet; mendoi se po shihte një vegim.
¹⁰ Si kaluan rojën e parë dhe të dytën, arritën te porta prej hekuri që të nxjerr në qytet; kjo iu hap vetiu dhe ata dolën. Pasi kishin përshkuar një copë rrugë, engjëlli u largua menjëherë prej tij.
¹¹ Kur Pjetri erdhi në vete, tha: "Tani po e kuptoj vërtet që Zoti paska dërguar engjëllin e Vet dhe më shpëtoi nga dora e Herodit dhe nga të gjitha ato që po priste populli i judenjve.
¹² Pasi u mendua, shkoi te shtëpia e Marisë, nënës së Gjonit, që e thërrisnin edhe Mark, ku ishin mbledhur shumë veta dhe luteshin.
¹³ Trokiti në portën e hyrjes dhe një shërbëtore, me emrin Rode, u afrua për të dëgjuar.
¹⁴ Ajo, me të njohur zërin e Pjetrit, nga gëzimi, nuk e hapi portën, por vrapoi brenda dhe njoftoi se Pjetri po qëndronte para portës.
¹⁵ Ata i thanë: "Paske luajtur mendsh!" Por ajo ngulte këmbë se ashtu ishte. Ata thoshin: "Duhet të jetë engjëlli i tij."
¹⁶ Por Pjetri vazhdonte të trokiste. Kur e hapën portën, e panë dhe mbetën të mahnitur.
¹⁷ Ai u bëri shenjë me dorë që të heshtnin dhe u tregoi se si Zoti e kishte nxjerrë nga burgu dhe tha: "Ua tregoni këto Jakobit dhe vëllezërve." Pastaj doli e shkoi në një vend tjetër.
¹⁸ Me të zbardhur dita, u bë një rrëmujë e madhe midis ushtarëve dhe pyesnin: "Ç’u bë Pjetri, vallë?"
¹⁹ Kur Herodi e kërkoi gjithandej dhe nuk e gjeti, i mori në pyetje rojat dhe urdhëroi që të ekzekutoheshin. Pastaj Herodi zbriti nga Judeja në Cezare dhe kaloi njëfarë kohe atje.
²⁰ Ai ishte zemëruar me banorët e Tirit dhe të Sidonit. Këta të gjithë së bashku shkuan tek ai dhe, si e bënë për vete Blastin, kryeshërbëtorin e mbretit, kërkuan paqe, sepse vendi i tyre furnizohej me ushqime nga vendi i mbretit.
²¹ Ditën e caktuar Herodi veshi rrobën mbretërore, u ul në fron dhe filloi t’u mbante një fjalim.
²² Turma thërriste: "Ky është zë perëndie dhe jo njeriu!"
²³ Papritur atë e goditi një engjëll i Zotit, sepse nuk i dha lavdi Perëndisë dhe dha shpirt duke përfunduar ushqim për krimbat.
²⁴ Por fjala e Perëndisë vazhdonte të rritej e të përhapej.
²⁵ Barnaba dhe Sauli, pasi e përmbushën misionin e tyre, u kthyen nga Jeruzalem, duke marrë me vete Gjonin, që e thërrisnin edhe Mark.