kap 1
kap 2
kap 3

Titit

^3
1 Kujtojua që t’u nënshtrohen krerëve dhe autoriteteve, të jenë të bindur, të jenë gati për të bërë çdo vepër të mirë,
² të mos përgojojnë askënd, të mos grinden, të jenë zemërgjerë dhe të tregohen plotësisht zemërbutë me të gjithë njerëzit.
³ Sepse dikur edhe ne ishim të marrë, të pabindur, të mashtruar, robër të epsheve dhe të qejfeve të ndryshme, dhe e kalonim jetën në ligësi dhe smirë, duke u urryer dhe duke urryer njëri-tjetrin.
⁴ Por kur u shfaq mirësia e Perëndisë Shpëtimtarit tonë dhe dashuria e Tij për njerëzit,
⁵ Ai na shpëtoi jo në sajë të veprave të drejtësisë që kishim bërë, por në sajë të mëshirës së Vet, nëpërmjet larjes së rilindjes dhe ripërtëritjes që jep Fryma e Shenjtë,
⁶ të cilin Ai e derdhi mbi ne me begati nëpërmjet Jezus Krishtit Shpëtimtarit tonë,
⁷ që ne, duke u shfajësuar prej hirit të Tij, të bëheshim trashëgimtarë duke pasur shpresën e jetës së amshuar.
⁸ Kjo është një thënie që ia vlen të besohet. Dua që t’i theksosh këto, në mënyrë që ata që besojnë Perëndinë, t’i përkushtohen kryerjes së veprave të mira. Këto janë të mira dhe të dobishme për njerëzit.
⁹ Por shmang debatet e marra, gjenealogjitë, grindjet dhe mosmarrëveshjet për Ligjin, sepse këto janë të padobishme dhe të kota.
¹⁰ Mos e prano njeriun përçarës, pasi ta kesh paralajmëruar herën e parë e të dytë.
¹¹ Ta dish se një njeri i këtillë ka dalë nga rruga e drejtë dhe po mëkaton, duke e dënuar veten.
¹² Sapo të të dërgoj Arteman ose Tikikun, bëj çmos që të vish tek unë në Nikopoli, sepse atje kam vendosur ta kaloj dimrin.
¹³ Ndihmoji pa u kursyer për udhëtim Zenën, mjeshtrin e ligjit, dhe Apolonin, që asgjë të mos u mungojë.
¹⁴ Edhe njerëzit tanë të mësojnë t’u përkushtohen veprave të mira, për të plotësuar nevojat e ditës, që të mos jenë të padobishëm.
¹⁵ Të përshëndesin të gjithë ata që janë me mua. Përshëndeti ata që na duan në besim. Hiri qoftë me të gjithë ju.