kap 1
kap 2
kap 3

Titit

^2
1 Por ti, fol ato që përkojnë me mësimin e shëndoshë.
² Të moshuarit të jenë të vetëpërmbajtur, me dinjitet, të urtë, të shëndoshë në besim, në dashuri e në durim.
³ Po ashtu, gratë e moshuara të sillen siç u ka hije shenjtërve, jo shpifarake, jo skllave pas verës së tepërt, dhe t’u mësojnë njerëzve të mirën.
⁴ Kështu, ato mund t’i mësojnë të rejat t’i duan burrat e tyre, t’i duan fëmijët e tyre,
⁵ të jenë të urta, të dëlira, të dhëna pas punëve të shtëpisë, të mira, të bindura ndaj burrave të tyre, që fjala e Perëndisë të mos shahet.
⁶ Nxiti po ashtu të rinjtë që të jenë të urtë;
⁷ në gjithçka, bëje veten shembull për vepra të mira, duke i mësuar njerëzit me pastërti, me dinjitet,
⁸ me ligjërim të shëndoshë e të paqortueshëm, në mënyrë që kundërshtari, të bëhet me turp, dhe të mos ketë asgjë të keqe për të thënë për ne.
⁹ Këshilloji shërbëtorët t’u binden zotërinjve të tyre në çdo gjë, të përpiqen t’i kënaqin ata, të mos kthejnë fjalë,
¹⁰ të mos përvetësojnë gjënë e tjetrit, por të tregojnë besnikëri të plotë, që ta bëjnë tërheqës në çdo drejtim mësimin e Perëndisë, Shpëtimtarit tonë.
¹¹ Sepse hiri i Perëndisë është shfaqur, duke u sjellë shpëtimin të gjithë njerëzve,
¹² duke na udhëzuar që të mohojmë çka është e papërshpirtshme si edhe dëshirat e botës e të jetojmë të vetëpërmbajtur, në mënyrë të drejtë dhe të përshpirtshme në epokën e tanishme,
¹³ ndërsa presim shpresën e bekuar dhe shfaqjen e lavdisë së të madhit Perëndi dhe Shpëtimtarit tonë Jezus Krishtit,
¹⁴ i cili dha Veten e Vet për ne, për të na çliruar me anë të shpengimit nga çdo paudhësi dhe për të pastruar një popull, që t’i përkiste Atij dhe të ishte i zellshëm për vepra të mira.
¹⁵ Këto pra janë ato që duhet t’u mësosh. Jepu zemër dhe qortoji me autoritet të plotë. Askush të mos të përbuzë.