kap 1
kap 2
kap 3

Titit

^1
1 Pali, shërbëtor i Perëndisë dhe apostull i Jezus Krishtit, për besimin e të zgjedhurve të Perëndisë dhe për njohjen e së vërtetës që shpie në përshpirtshmëri,
² besim dhe njohje, që mbështeten në shpresën e jetës së amshuar, të cilën Perëndia, që nuk gënjen, e premtoi përpara fillimit të kohëve,
³ dhe në kohën e duhur e shfaqi fjalën e Vet nëpërmjet predikimit që m’u besua mua sipas urdhrit të Perëndisë Shpëtimtarit tonë,
⁴ Titit, birit tim të vërtetë sipas besimit të përbashkët: Hir dhe paqe nga Perëndia Atë dhe Krishti Jezus Shpëtimtari ynë.
⁵ Për këtë arsye të lashë në Kretë, që t’i vije në rregull punët që kishin mbetur pambaruar dhe të caktoje pleq në çdo qytet, sipas udhëzimeve që të kam dhënë,
⁶ domethënë, të caktoje si plak dikë që është i paqortueshëm, burrë vetëm i një gruaje, me fëmijë besimtarë që nuk mund të akuzohen për jetë të shthurur ose për mosbindje.
⁷ Sepse mbikëqyrësi, si kujdestar i shtëpisë së Perëndisë, duhet të jetë i paqortueshëm, jo kokëfortë, jo zemërak, jo i dhënë pas pijes, jo i dhunës, jo i dhënë pas fitimeve të pandershme.
⁸ Përkundrazi ai duhet të jetë mikpritës, që do të mirën, i urtë, i drejtë, i përshpirtshëm, i vetëpërmbajtur,
⁹ duke qenë i lidhur fort me mesazhin e besës sipas mësimit që mori, që të mund t’u japë zemër të tjerëve me doktrinën e shëndoshë dhe t’i përgënjeshtrojë ata që flasin kundër.
¹⁰ Sepse ka shumë të pabindur, llafazanë dhe mashtrues, sidomos nga ata të rrethprerjes.
¹¹ Këtyre duhet t’u mbyllet goja, sepse po ngatërrojnë familje të tëra, duke u mësuar gjëra që nuk duhet, dhe kjo, për fitime të pandershme.
¹² Një nga ata, një profet i tyre, tha: "Kretasit janë gjithmonë gënjeshtarë, bisha të këqija, grykës e përtacë."
¹³ Kjo dëshmi është e vërtetë. Për këtë arsye qortoji ashpër, që ata të qëndrojnë të shëndoshë në besim
¹⁴ dhe të mos ua vënë veshin përrallave të judenjve dhe rregullave të njerëzve që i janë larguar së vërtetës.
¹⁵ Gjithçka është e pastër për ata që janë të pastër, ndërsa për ata që janë të ndotur dhe pa besim, asgjë nuk është e pastër. Në të vërtetë atyre u është ndotur si mendja ashtu edhe ndërgjegjja.
¹⁶ Ata pohojnë se e njohin Perëndinë, por me veprat e veta e mohojnë Atë. Ata janë të neveritshëm, të pabindur dhe të papërshtatshëm për të bërë ndonjë punë të mirë.