kap 1
kap 2
kap 3
kap 4

2 Timoteut

^4
1 Po ju jap këtë porosi para Perëndisë dhe Krishtit Jezus, që ka për të gjykuar të gjallët dhe të vdekurit, si me shfaqjen e Tij, ashtu edhe me mbretërinë e Tij:
² prediko fjalën; të jesh gati me kohë e pa kohë; qorto, kritiko, nxit, dhe këto bëji me durim të madh e udhëzim të kujdesshëm.
³ Sepse do të vijë koha kur ata nuk do ta durojnë mësimin e shëndoshë, por, për të kënaqur dëshirat e veta, do të mbledhin rreth tyre një numër të madh mësuesish që t’u thonë ato gjëra që u kënaqin veshët.
⁴ Do t’i largojnë veshët nga e vërteta, duke u kthyer te mitet.
⁵ Por ti të jesh syhapët në gjithçka, duro të keqen, bëj punën e ungjillorit, kryej shërbesën tënde.
⁶ Për sa më takon mua, gjaku im po përgatitet të derdhet si flijim pijeje dhe është afruar koha të largohem.
⁷ Luftën e mirë kam bërë, garën e përfundova, besimin e kam mbajtur.
⁸ Pas kësaj më pret kurora e drejtësisë, të cilën do të ma japë Zoti, Gjykatësi i drejtë, në atë ditë; dhe jo vetëm mua por edhe të gjithë atyre që janë të dëshiruar për shfaqjen e Tij.
⁹ Bëj çmos që të vish sa më shpejt tek unë,
¹⁰ sepse Dema, duke rënë në dashuri me botën e tanishme, më ka braktisur dhe ka shkuar në Selanik, Krisku ka shkuar në Galaci dhe Titi në Dalmaci.
¹¹ Vetëm Lluka është me mua. Merre Markun dhe sille me vete, sepse ai më bën punë në shërbesën time.
¹² Ndërsa Tikikun e kam dërguar në Efes.
¹³ Kur të vish, sill mantelin që lashë në Troadë te Karpi, si edhe librat, sidomos pergamenat.
¹⁴ Aleksandër bakërpunuesi më ka bërë shumë dëm. Zoti do t’ia shpërblejë sipas veprave të tij.
¹⁵ Ruhu edhe ti prej tij, sepse ai i ka kundërshtuar me forcë fjalët tona.
¹⁶ Në mbrojtjen time të parë askush nuk më doli krah, por të gjithë më kthyen krahët. Mos u marrtë parasysh kjo gjë kundër tyre.
¹⁷ Por Zoti m’u bë krah dhe më dha fuqi, që nëpërmjet meje të shpallej plotësisht mesazhi, që të gjitha kombet të dëgjonin. Dhe shpëtova prej gojës së luanit.
¹⁸ Zoti do të më shpëtojë nga çdo vepër e ligë dhe do të më çojë shëndoshë e mirë në mbretërinë e Vet qiellore. Atij i qoftë lavdia për jetë të jetëve. Amen.
¹⁹ Përshendet Priskën, Akuilën dhe shtëpinë e Onesiforit.
²⁰ Erasti qëndroi në Korint, por Trofimin e lashë duke lënguar në Milet.
²¹ Bëj çmos të vish përpara dimrit. Të përshëndesin Eubuli, Pudeni, Lini, Klaudia dhe të gjithë vëllezërit.
²² Zoti qoftë me shpirtin tënd. Hiri qoftë me ju.