kap 1
kap 2
kap 3
kap 4

2 Timoteut

^3
1 Merre vesh këtë: në ditët e fundit do të vijnë kohë të vështira.
² Sepse njerëzit do të duan veten e tyre, do të duan paranë, do të jenë mburravecë, arrogantë, fyes, të pabindur ndaj prindërve, mosmirënjohës, të pashenjtë,
³ pa ndjenja dashurie, të papajtueshëm, shpifës, të papërmbajtur, mizorë, që nuk e duan të mirën,
⁴ tradhtarë, të nxituar, të krekosur, që duan më shumë dëfrimet sesa Perëndinë,
⁵ duke qenë në dukje të përshpirtshëm, por që e kanë mohuar fuqinë e saj; këtyre shmangiu.
⁶ Sepse këta janë të tillë që futen në shtëpitë dhe shtien në lak femrat mendjelehta të rënduara nga mëkatet, të shtyra nga gjithfarë epshesh,
⁷ që rrinë gjithmonë duke mësuar, por kurrë nuk janë në gjendje të arrijnë te njohja e së vërtetës.
⁸ Ashtu si Janesi dhe Jambresi e kundërshtuan Moisiun, po ashtu edhe këta i kundërvihen së vërtetës, njerëz që i ka lënë mendja, të papranueshëm për sa i përket besimit.
⁹ Por ata nuk do të shkojnë shumë larg, sepse marrëzia e tyre do të bëhet e qartë për të gjithë, sikurse u ndodhi edhe atyre.
¹⁰ Por ti më ke ndjekur në mësimin tim, sjelljen, qëllimin, besimin, durimin, dashurinë, ngulmimin,
¹¹ përndjekjet, vuajtjet, si ato që më ndodhën në Antioki, në Ikoni, në Listër. Ç’përndjekje kam duruar! Megjithatë Zoti më shpëtoi prej tyre.
¹² Vërtet, të gjithë ata që dëshirojnë të bëjnë një jetë të përshpirtshme në Krishtin Jezus, do të përndiqen,
¹³ ndërsa njerëzit e ligj dhe mashtruesit do të përfundojnë keq e më keq, duke mashtruar dhe njëkohësisht duke u mashtruar.
¹⁴ Por ti, qëndro në ato që ke mësuar dhe që je i bindur, duke e ditur prej kujt i mësove këto,
¹⁵ sepse që fëmijë i ke njohur Shkrimet e Shenjta, të cilat janë në gjendje të të japin mençurinë që sjell shpëtimin nëpërmjet besimit në Krishtin Jezus.
¹⁶ I gjithë Shkrimi është i frymëzuar nga Perëndia dhe është i dobishëm për mësim, qortim, ndreqje dhe për edukim me drejtësi,
¹⁷ në mënyrë që njeriu i Perëndisë të jetë i përsosur, plotësisht i përgatitur për çdo punë të mirë.