kap 1
kap 2
kap 3
kap 4

2 Timoteut

^2
1 Ti, pra, biri im, bëhu i fortë në hirin që është në Krishtin Jezus.
² Ato që ke dëgjuar prej meje në prani të shumë dëshmitarëve, këto ua beso njerëzve besnikë, që do të jenë të aftë t’ua mësojnë edhe të tjerëve.
³ Vuaj bashkë me mua si ushtar i mirë i Krishtit Jezus.
⁴ Askush prej atyre që shërbejnë si ushtarë, nuk ngatërrohet me punët e jetës së përditshme, që të kënaqë atë që e mori ushtar.
⁵ Po të marrë pjesë dikush në ndeshje, atij nuk i jepet kurora, nëse nuk lufton sipas rregullave.
⁶ Bujku që mundohet, duhet të jetë i pari që të marrë pjesën e vet të fryteve.
⁷ Mendo atë që them, sepse Zoti do të të japë mend për gjithçka.
⁸ Kujto Jezus Krishtin, të ngjallur nga të vdekurit, pasardhës i Davidit. Ky është ungjilli im,
⁹ për të cilin po vuaj, madje i lidhur në pranga si keqbërës. Por fjala e Perëndisë nuk burgoset.
¹⁰ Për këtë arsye të gjitha po i duroj për hir të atyre që janë zgjedhur, që edhe ata të marrin shpëtimin që është në Krishtin Jezus dhe bashkë me të lavdi të përjetshme.
¹¹ Ja një thënie që ia vlen të besohet: Nëse vdesim me Të, edhe do të jetojmë me Të,
¹² nëse durojmë, edhe do të mbretërojmë me Të, nëse do ta mohojmë Atë, edhe Ai do të na mohojë,
¹³ nëse neve na mungon besimi, Ai mbetet besnik, sepse Ai nuk mund ta mohojë veten e Vet.
¹⁴ Vazhdo t’ua kujtosh këto gjëra dhe porositi përpara Perëndisë të mos grinden për fjalë; kjo nuk sjell asnjë dobi dhe është në dëmin e atyre që dëgjojnë.
¹⁵ Bëj çmos ta paraqitësh veten të miratuar përpara Perëndisë, si një punëtor që s’ka pse të ketë turp që e përdor drejt fjalën e së vërtetës.
¹⁶ Por shmangiu llomotitjeve të rëndomta e të zbrazëta, sepse më tepër do të të largojnë prej përshpirtshmërisë,
¹⁷ dhe fjala e tyre do të përhapet si gangrenë. Midis tyre janë Himeneu dhe Fileti,
¹⁸ të cilët i janë larguar së vërtetës, duke thënë se ngjallja ka ndodhur tashmë dhe kështu përmbysin besimin e disave.
¹⁹ Megjithatë, themeli i fortë i Perëndisë qëndron i patundur, duke pasur këtë vulë: "Zoti i njeh ata që janë të Tijtë," dhe "Le të largohet prej paudhësisë çdo njeri që përmend emrin e Zotit."
²⁰ Në një shtëpi të madhe nuk ka vetëm enë prej ari e argjendi, por edhe enë druri e balte, pra, disa për raste të veçanta dhe disa të tjera për përdorim të rëndomtë.
²¹ Prandaj, ai që do ta pastrojë veten prej atyre gjërave, do të jetë enë nderi, i shenjtëruar, i dobishëm për Mjeshtrin, i përgatitur për çdo punë të mirë.
²² Largohu prej epsheve rinore dhe ndiq drejtësinë, besimin, dashurinë dhe paqen, bashkë me ata që i drejtojnë thirrje Zotit me zemër të pastër.
²³ Shmangiu debateve të marra e pa mend, sepse ti e di që ato të çojnë në grindje.
²⁴ Shërbëtori i Zotit nuk duhet të grindet, por të jetë i butë me të gjithë, i aftë t’i mësojë të tjerët, i durueshëm me të ligën,
²⁵ t’u japë udhëzime me butësi atyre që janë kundër, me shpresën se Perëndia u jep atyre pendimin që çon në njohjen e së vërtetës,
²⁶ dhe ata pastaj vijnë në vete duke shpëtuar nga laku i djallit, i cili i ka zënë robër që të bëjnë vullnetin e tij.