kap 1
kap 2
kap 3
kap 4
kap 5
kap 6

1 Timoteut

^6
1 Gjithë sa janë nën zgjedhë si skllevër, t’i vlerësojnë zotërinjtë e tyre si të denjë për çdo nder, që emri i Perëndisë dhe mësimi ynë të mos përgojohen.
² Atyre që i kanë zotërinjtë e vet besimtarë, të mos u mungojë respekti, sepse janë vëllezër, por t’u shërbejnë edhe më shumë, sepse ata që përfitojnë janë besimtarë dhe të dashur. Këto gjëra t’u mësosh dhe t’u këshillosh njerëzve.
³ Nëse dikush u mëson njerëzve ndonjë doktrinë tjetër dhe nuk u përmbahet fjalëve të shëndosha të Zotit tonë Jezus Krisht dhe doktrinës që është sipas përshpirtshmërisë,
⁴ ai krekoset dhe nuk merr vesh asgjë; ai e ka në gjak për të bërë grindje dhe sherre për fjalë, prej të cilave lindin smira, grindjet, sharjet, dyshimet e liga,
⁵ debatet e pafund të njerëzve mendjeprishur, të cilëve u mungon e vërteta dhe që e mendojnë përshpirtshmërinë si burim fitimi.
⁶ Përshpirtshmëria sjell fitim të madh për atë që kënaqet me ato që ka.
⁷ Sepse ne nuk kemi sjellë gjë me vete në këtë botë dhe as nuk mund të marrim gjë prej saj.
⁸ Po të kemi ç’të hamë e me se të mbulohemi, me këto le të kënaqemi.
⁹ Por ata që duan të bëhen të pasur, bien në tundim, në kurth dhe në dëshira të shumta të marra dhe të dëmshme, që i zhysin njerëzit në shkatërrim dhe rrënim.
¹⁰ Sepse lakmia për para është rrënja e të gjitha të këqijave dhe disa, duke lakmuar, janë larguar nga besimi dhe e kanë sfilitur veten e tyre me shumë dhimbje.
¹¹ Por ti, o njeri i Perëndisë, ik prej këtyre gjërave dhe ndiq drejtësinë, përshpirtshmërinë, besimin, dashurinë, durimin dhe butësinë.
¹² Bëj luftën e mirë të besimit. Përqafo jetën e amshuar në të cilën je thirrur kur ke bërë rrëfimin e mirë para shumë dëshmitarëve.
¹³ Po të porosit përpara Perëndisë, që u jep jetë të gjitha gjërave dhe para Krishtit Jezus, i cili kur dëshmoi para Ponc Pilatit bëri pohimin e Tij të bukur,
¹⁴ që ta ruash këtë urdhërim të panjollosur e pa të meta deri në ardhjen e Zotit tonë Jezus Krishtit,
¹⁵ të cilën Perëndia do ta sjellë në kohën e duhur, Perëndia, Sovrani i bekuar dhe i vetëm, Mbreti i mbretërve dhe Zoti i zotërinjve,
¹⁶ Ai që i vetmi ka pavdekësinë, që banon në një dritë pranë së cilës askush nuk mund të afrohet, të cilën asnjë prej njerëzve nuk e ka parë e as nuk mund ta shohë. Atij i qoftë nderi dhe pushteti i përjetshëm! Amen.
¹⁷ Porositi të pasurit e kësaj jete të mos jenë mendjemëdhenj, as të mos i mbajnë shpresat te pasuritë, të cilat janë të pasigurta, por te Perëndia, që na siguron me tepri gjithçka që ta gëzojmë.
¹⁸ Porositi të bëjnë mirë, të jenë të pasur në vepra të mira, të jenë bujarë dhe të gatshëm të ndajnë me njëri-tjetrin.
¹⁹ Kështu ata do të vënë mënjanë një thesar për veten e tyre si një themel të fortë për të ardhmen, që të arrijnë atë që është vërtet jetë.
²⁰ O Timote, ruaje atë që të është besuar, duke iu shmangur bisedave të kota e profane dhe argumenteve të asaj që në mënyrë të rreme quhet "dije",
²¹ të cilën disa e kanë pranuar dhe kështu kanë dalë nga besimi. Hiri qoftë me ju!