kap 1
kap 2
kap 3
kap 4
kap 5
kap 6

1 Timoteut

^5
1 Mos e qorto me ashpërsi të moshuarin, por këshilloje sikur të ishte yt atë. Me më të rinjtë sillu si me vëllezër,
² me të moshuarat si me nëna dhe me më të rejat si me motra, me pastërti të plotë.
³ Nderoji vejushat që janë vërtet vejusha.
⁴ Por nëse ndonjë vejushë ka fëmijë ose nipa, më parë ata duhet të mësohen të tregohen të përshpirtshëm në shtëpinë e vet dhe t’ua kthejnë shpërblimin prindërve të vet, sepse kjo është e pëlqyeshme për Perëndinë.
⁵ Ajo që është vërtet vejushë dhe që ka mbetur e vetme, e ka varur shpresën te Perëndia dhe vazhdon me përgjërime dhe lutje ditë e natë.
⁶ Por ajo që bën një jetë pas qejfeve, edhe pse e gjallë, është e vdekur.
⁷ Këto pra, të japësh porosi, që të jenë të paqortueshëm.
⁸ Por nëse dikush nuk kujdeset për njerëzit e vet, sidomos për ata të shtëpisë së vet, ai e ka mohuar besimin dhe është më keq se ai që nuk beson.
⁹ Si vejushë mund të regjistrohet ajo grua, që i ka kaluar të gjashtëdhjetat, dhe ka qenë grua vetëm e një burri,
¹⁰ që ka emër për vepra të mira, ka rritur fëmijë, është treguar mikpritëse ndaj të huajve, ka larë këmbët e shenjtërve, u ka dhënë ndihmë atyre që janë në hall dhe që nuk është kursyer të bëjë çdo lloj vepre të mirë.
¹¹ Por mos prano të përfshish si vejusha gra më të reja, sepse të shtyra nga dëshirat e tyre eshpore, ato nuk i përkushtohen më Krishtit, dhe duan të martohen përsëri,
¹² duke marrë kështu dënimin, sepse kanë shkelur zotimin e parë.
¹³ Dhe në të njëjtën kohë ato, duke shkuar shtëpi më shtëpi, mësohen të jenë përtace dhe jo vetëm përtace, por edhe llafazane e kinse të zëna me punë, duke folur gjëra që s’duhen.
¹⁴ Prandaj, dua që vejushat më të reja të martohen, të bëjnë fëmijë e të mbajnë shtëpinë, për të mos i dhënë kundërshtarit asnjë rast të flasë,
¹⁵ sepse disa tashmë kanë ndërruar rrugë duke ndjekur Satanin.
¹⁶ Në qoftë se ndonjë besimtare ka vejusha në familjen e vet, le t’i ndihmojë ato që të mos rëndohet kisha, që kjo të ndihmojë ato që janë vërtet vejusha.
¹⁷ Pleqtë që drejtojnë mirë punët e kishës, të nderohen dyfish, sidomos ata që mundohen duke predikuar dhe mësuar njerëzit.
¹⁸ Sepse Shkrimi thotë: "Mos i vër gojëz kaut që shin në lëmë" dhe "Punëtori e ka hak pagën e vet."
¹⁹ Mos prano padi kundër ndonjërit prej pleqësisë, veç po t’i dalin dy ose tre dëshmitarë.
²⁰ Ata që mëkatojnë, qortoji para të gjithëve, që edhe të tjerët të kenë frikë se mos mëkatojnë.
²¹ Po të ngarkoj para Perëndisë dhe Krishtit Jezus dhe engjëjve të zgjedhur të Tij, që t’i ruash këto porosi pa paragjykime dhe asgjë të mos bësh duke i mbajtur anën ndokujt.
²² Mos u nxito për t’i vënë duart sipër ndokujt, as mos u bëj pjesëtar në mëkatet e të tjerëve. Ruaje veten të pastër.
²³ Mos pi më vetëm ujë, por përdor pak verë për stomakun dhe për sëmundjet e tua të shpeshta.
²⁴ Mëkatet e disa njerëzve duken sheshit, duke arritur para tyre në vendin e gjykimit; disa të tjerëve, mëkatet u shfaqen më vonë.
²⁵ Po ashtu edhe veprat e mira duken sheshit dhe ato që nuk janë të tilla, nuk mund të fshihen.