kap 1
kap 2
kap 3
kap 4
kap 5
kap 6

1 Timoteut

^4
1 Por Fryma e thotë qartë se në kohët e fundit disa do të largohen nga besimi, duke iu kushtuar frymëve mashtruese dhe gjërave të mësuara nga demonët,
² të cilat vijnë nëpërmjet hipokrizisë së gënjeshtarëve, të damkosur me hekur të nxehtë në ndërgjegjen e tyre.
³ Nuk do t’i lënë njerëzit të martohen dhe do t’i bëjnë të heqin dorë nga disa ushqime që Perëndia i ka krijuar për t’u ngrënë me mirënjohje prej atyre që besojnë dhe e njohin të vërtetën.
⁴ Sepse çdo krijesë e Perëndisë është e mirë dhe asgjë nuk është për t’u hedhur poshtë, kur pranohet me falënderime,
⁵ sepse shenjtërohet nëpërmjet fjalës së Perëndisë dhe lutjes.
⁶ Po t’ua mësosh këto vëllezërve, do të jesh një shërbyes i mirë i Krishtit Jezus, duke u ushqyer me fjalët e besimit dhe të mësimit të shëndoshë që ke ndjekur.
⁷ Qëndro larg nga mitet profane të sajuara nga plakat. Përkundrazi ushtroje veten të jesh i përshpirtshëm,
⁸ sepse ushtrimi fizik ka njëfarë vlere, por përshpirtshmëria është e dobishme për gjithçka, meqë mban premtimin e jetës së tanishme dhe të asaj që vjen.
⁹ Kjo është fjalë që ia vlen të besohet dhe të pranohet plotësisht.
¹⁰ Për këtë mundohemi dhe luftojmë, sepse shpresat i kemi përqendruar te Perëndia i gjallë, që është Shpëtimtari i gjithë njerëzve, sidomos i besimtarëve.
¹¹ Udhëzoji këto gjëra dhe mësojua njerëzve.
¹² Askush të mos të nënvlerësojë për moshën tënde të re, por bëhu shembull për besimtarët, në fjalë, në sjellje, në dashuri, në besim, në pastërti.
¹³ Derisa të vij unë, përkushtoju leximit publik të Shkrimit, predikimit dhe mësimit.
¹⁴ Mos e lër pas dore dhuntinë tënde, që t’u dha nëpërmjet profecisë, kur pleqtë vunë duart mbi ty.
¹⁵ Mos i hiq nga mendja këto; kushtojua veten këtyre gjërave, në mënyrë që të gjithë ta shohin përparimin tënd.
¹⁶ Kujdesu për veten tënde dhe për mësimin. Të jesh këmbëngulës në këto, sepse duke bërë këtë, do të sigurosh shpëtimin si ti vetë ashtu edhe ata që të dëgjojnë.