kap 1
kap 2
kap 3
kap 4
kap 5
kap 6

1 Timoteut

^3
1 Ja një thënie që ia vlen të besohet: nëse dikujt ia ka ënda të bëhet mbikqyrës, ai dëshiron një punë fisnike.
² Por mbikqyrësi, duhet të jetë i paqortueshëm, burrë vetëm i një gruaje, i përmbajtur, i arsyeshëm, i respektueshëm, mikpritës, i aftë të mësojë njerëzit,
³ jo i dhënë pas verës, jo njeri i dhunës, por i butë, jo grindavec, jo lakmues i parasë.
⁴ Ai duhet ta qeverisë mirë shtëpinë e vet, dhe të kujdeset që fëmijët e tij t’i binden me respektin e duhur.
⁵ (Por nëse dikush nuk di si të qeverisë shtëpinë e vet, si do të kujdeset për kishën e Perëndisë?)
⁶ Ai nuk duhet të jetë besimtar i sapokthyer, se mos i rritet mendja dhe bie në dënimin e djallit.
⁷ Duhet të ketë emër të mirë ndër ata që janë jashtë, që të mos bëhet për t’u qortuar dhe të bjerë në lakun e djallit.
⁸ Po ashtu dhjakët duhet të jenë njerëz me dinjitet, jo me dy fytyra, të mos jenë të dhënë së tepërmi pas verës, të mos lakmojnë për fitime të pandershme,
⁹ por të ruajnë misterin e besimit me ndërgjegje të pastër.
¹⁰ Këta duhet të vihen më parë në provë dhe pastaj, po të shihen se janë të paqortueshëm, le të shërbejnë si dhjakë.
¹¹ Gratë po ashtu duhet të jenë me dinjitet, jo shpifarake, por të përmbajtura e besnike në gjithçka.
¹² Dhjakët duhet të jenë të martuar vetëm me një grua dhe kujdestarë të mirë të fëmijëve dhe të shtëpive të veta.
¹³ Sepse ata që shërbejnë mirë si dhjakë, fitojnë një pozitë të nderuar për veten e tyre dhe siguri të madhe në besimin që është në Krishtin Jezus.
¹⁴ Megjithëse shpresoj të vij së shpejti tek ti, po t’i shkruaj këto,
¹⁵ që po të vonohem, ta dish si duhet të sillesh në shtëpinë e Perëndisë, që është kisha e Perëndisë së gjallë, shtylla dhe themelli i së vërtetës.
¹⁶ Siç e pohojnë të gjithë, i madh është misteri i përshpirtshmërisë: Ai që u shfaq në mish, u shfajësua në Frymë, u pa nga engjëjt, u predikua ndër kombet, u besua në botë, u mor lart në lavdi.