kap 1
kap 2
kap 3
kap 4
kap 5
kap 6

1 Timoteut

^2
1 Po bëj thirrje, pra, para së gjithash, që të bëhen përgjërime, lutje, ndërmjetësime dhe falënderime për të gjithë njerëzit,
² për mbretërit dhe për të gjithë ata që janë në pushtet, që të bëjmë jetë në paqe dhe të qetë plot me përshpirtshmëri dhe dinjitet.
³ Kjo është punë e mirë dhe e pëlqyeshme për Perëndinë Shpëtimtarin tonë,
⁴ i cili dëshiron që të gjithë njerëzit të shpëtohen dhe të arrijnë të njohin të vërtetën.
⁵ Sepse ka një Perëndi të vetëm dhe një ndërmjetës midis Perëndisë dhe njerëzve, njeriu Krishti Jezus,
⁶ i cili e dha Veten e Vet si shpërblesë për të gjithë njerëzit, që për këtë të jepet dëshmi në kohën e duhur.
⁷ Për këtë unë u vura predikues dhe apostull (të vërtetën po them, nuk po gënjej) dhe mësues i kombeve në besim e në vërtetësi.
⁸ Prandaj dua që njerëzit në çdo vend të luten, duke ngritur lart duart e shenjta, pa zemëratë dhe pa grindje.
⁹ Po ashtu, dua që edhe gratë ta stolisin veten hijshëm, me cipë dhe urtësi, jo me gërsheta e ar, as me margaritarë e me petka të shtrenjta,
¹⁰ por me vepra të mira, siç u ka hije grave që pranojnë hapur se i shërbejnë Perëndisë.
¹¹ Le të mësojë gruaja në heshtje dhe në nënshtrim të plotë.
¹² Por nuk lejoj që gruaja të japë mësim, as të përdorë pushtet mbi burrin, por të qëndrojë në heshtje.
¹³ Sepse Adami u krijua i pari, pastaj Eva.
¹⁴ Nuk ishte Adami ai që u mashtrua, por gruaja u mashtrua dhe ra në mëkat.
¹⁵ Por ato do të shpëtojnë nëpërmjet lindjes së fëmijëve nëse tregohen të matura duke qëndruar në besim, dashuri dhe shenjtërim.