kap 1
kap 2
kap 3
kap 4
kap 5
kap 6

1 Timoteut

^1
1 Pali, apostull i Krishtit Jezus sipas porosisë së Perëndisë, Shpëtimtarit tonë, dhe Krishtit Jezus, shpresës sonë,
² Timoteut, birit të vërtetë në besim: Hir, mëshirë, paqe nga Perëndia Atë dhe Krishti Jezus Zoti ynë.
³ Siç të kam këshilluar, kur u largova për në Maqedoni, duhet të qëndrosh në Efes, që t’u japësh udhëzime disave që të mos u mësojnë më njerëzve doktrina të tjera,
⁴ as të mos u vënë veshin miteve dhe gjenealogjive të pafund, që vlejnë më shumë për të përçarë sesa për të çuar më tej punën e Perëndisë që është prej besimit.
⁵ Por qëllimi i udhëzimit tonë është dashuri që vjen nga një zemër e pastër, ndërgjegje e mirë dhe besim i çiltër.
⁶ Prej këtyre janë larguar disa dhe i janë kthyer diskutimeve të kota.
⁷ Këta duan të bëhen mësues të Ligjit, edhe pse nuk i kuptojnë as ato që thonë, as ato që i pohojnë me bindje.
⁸ E dimë se Ligji është i mirë, po të përdoret siç duhet.
⁹ Ne e kuptojmë se ligji nuk është vënë për të drejtin, por për ata që thyejnë ligjet dhe ngrenë krye, për të pafetë dhe mëkatarët, për ata që nuk nderojnë Perëndinë dhe gjërat e shenjta, për ata që vrasin atin dhe nënën e tyre, për vrasësit,
¹⁰ të përdalët, homoseksualët, ata që rrëmbejnë njerëz, gënjeshtarët, ata që shkelin betimin dhe për çdo gjë tjetër që është në kundërshtim me mësimet e shëndosha,
¹¹ sipas ungjillit të lavdishëm të Perëndisë së bekuar, që më është besuar mua.
¹² Falënderoj Krishtin Jezus Zotin tonë, që më ka bërë të fortë, sepse Ai më gjykoi besnik, duke më vënë në shërbim të Vet,
¹³ edhe pse më parë isha blasfemues, përndjekës dhe njeri i dhunës. Por ndaj meje u tregua mëshirë, sepse i bëja nga padija, duke qenë larg besimit.
¹⁴ Hiri i Zotit tonë erdhi me begati, së bashku me besimin dhe dashurinë që janë në Krishtin Jezus.
¹⁵ Ja një thënie për t’u besuar dhe që ia vlen të pranohet: Krishti Jezus erdhi në botë për të shpëtuar mëkatarët, nga të cilët unë jam më i keqi.
¹⁶ Por pikërisht për këtë arsye u tregua mëshirë ndaj meje, që Krishti Jezus të shfaqte më parë tek unë durimin e Vet të pafund, për të qenë shembull për ata që do të besonin tek Ai dhe që do të fitonin jetën e amshuar.
¹⁷ Mbretit të përjetshëm, të pavdekshëm, të padukshëm, të vetmit Perëndi, i qoftë nderimi dhe lavdia për jetë të jetëve. Amen.
¹⁸ Këtë porosi po të jap ty, o biri im Timote, sipas profecive që janë bërë më parë për ty, që duke i ndjekur ato të luftosh luftën e mirë,
¹⁹ duke pasur besim dhe ndërgjegje të mirë, të cilat disa i hodhën poshtë dhe kështu besimi i tyre e pësoi si anija e mbytur.
²⁰ Midis tyre janë Himeneu dhe Aleksandri, të cilët ia kam dorëzuar Satanit, që të mësojnë të mos blasfemojnë.