kap 1
kap 2
kap 3

2 Selanikasve

^3
1 Më në fund, vëllezër, lutuni për ne, që fjala e Zotit të përhapet shpejt dhe të fitojë lavdi, siç ndodhi edhe me ju
² dhe lutuni që të shpëtojmë nga njerëzit e mbrapshtë dhe të ligj, sepse jo të gjithë kanë besim.
³ Por Zoti është besnik dhe do t’ju forcojë dhe do t’ju ruajë nga i ligu.
⁴ Ne kemi bindje në Zotin, se ju po bëni dhe do të bëni ato që ju porositim.
⁵ Jua drejtoftë Zoti zemrat te dashuria e Perëndisë dhe te durimi i Krishtit.
⁶ Ju porositim, o vëllezër, në emër të Zotit [tonë] Jezus Krisht, që të qëndroni larg nga cilido prej vëllezërve që bën jetë të çrregullt dhe nuk jeton sipas mësimit që keni marrë prej nesh.
⁷ Sepse ju vetë e dini si duhet të ndiqni shembullin tonë. Ne nuk bënim jetë të çrregullt kur ishim midis jush,
⁸ as kemi ngrënë falas bukën e ndonjërit, por me mund dhe përpjekje punuam natë e ditë që të mos i bëheshim barrë asnjërit prej jush.
⁹ Jo se nuk kemi të drejtë për një ndihmë të tillë, por që ne vetë t’ju japim shembull të na imitoni.
¹⁰ Sepse edhe kur ishim me ju, jua jepnim këtë porosi: kush nuk do të punojë, të mos hajë.
¹¹ Sepse dëgjojmë se disa midis jush po bëjnë një jetë të çrregullt dhe pa punuar fare, bëjnë sikur punojnë duke u sjellë vërdallë.
¹² Njerëzve të këtillë u japim porosi dhe u bëjmë thirrje në Zotin Jezus Krisht që të shtrohen e të hanë bukën e tyre duke punuar të qetë.
¹³ Por ju, vëllezër, të mos ju lëshojë zemra duke bërë mirë.
¹⁴ Nëse dikush nuk i bindet fjalës që po ju themi nëpërmjet kësaj letre, dallojeni këtë njeri dhe mos u shoqëroni me të, që ai të bëhet me turp.
¹⁵ Veçse mos e vështroni si armik, por qortojeni si vëlla.
¹⁶ Vetë Zoti i paqes ju dhëntë vazhdimisht paqe në çdo rrethanë. Zoti qoftë me të gjithë ju!
¹⁷ Përshëndetja është nga vetë dora ime, e Palit, që është shenjë dalluese në çdo letër; kështu shkruaj unë.
¹⁸ Hiri i Zotit tonë Jezus Krisht qoftë me të gjithë ju.