kap 1
kap 2
kap 3

2 Selanikasve

^2
1 Përsa i përket ardhjes së Zotit tonë Jezus Krisht dhe tubimit tonë rreth Tij, ju lutemi, vëllezër,
² të mos ju lëkundet lehtë mendja, as të mos shqetësoheni nga ndonjë frymë, fjalë ose letër, sikur të jetë dërguar prej nesh, se gjoja paska ardhur dita e Zotit.
³ Askush të mos ju mashtrojë kurrsesi, sepse ajo ditë nuk do të vijë pa ardhur më parë apostazia e madhe dhe pa u zbuluar njeriu i paudhësisë, biri i shkatërrimit.
⁴ Ai do ta kundërshtojë dhe do ta lartësojë veten mbi çdo qenie të quajtur perëndi ose objekt adhurimi, që të arrijë të ulet në tempullin e Perëndisë, duke shpallur veten Perëndi.
⁵ A nuk ju kujtohet se kur isha ende me ju, jua thosha këto gjëra?
⁶ Dhe tani e dini çka e ndalon atë, që ai të shfaqet në kohën e duhur.
⁷ Sepse misteri i paudhësisë është tashmë në veprim dhe kështu do të vazhdojë derisa ai që e pengon tani, të mos jetë më i pranishëm.
⁸ Dhe atëherë do të shfaqet i paudhi, të cilin Zoti [Jezus] do ta zhdukë me frymën e gojës së Vet dhe do ta asgjësojë nëpërmjet shkëlqimit vezullues të ardhjes së Vet.
⁹ Ardhja e të paudhit do të jetë sipas veprimit të Satanit, plot fuqi, shenja dhe mrekulli të rreme
¹⁰ dhe me çdo lloj ligësie që mashtron ata që janë të humbur, sepse ata nuk pranuan të donin të vërtetën që të shpëtoheshin.
¹¹ Për këtë arsye Perëndia u dërgon atyre një zhgënjim të fuqishëm, që ata t’i besojnë gënjeshtrës,
¹² dhe që të gjykohen të gjithë ata që, në vend që t’i besonin të vërtetës, u zbavitën në paudhësi.
¹³ Por ne duhet të falënderojmë gjithmonë Perëndinë për ju, vëllezër, të dashurit e Zotit, sepse Perëndia që në fillim ju zgjodhi ju për shpëtim me anë të veprimit shenjtërues të Frymës dhe besimit në të vërtetën.
¹⁴ Për këtë ju thirri Ai nëpërmjet ungjillit tonë, për të marrë pjesë në lavdinë e Zotit tonë Jezus Krisht.
¹⁵ Kështu pra, vëllezër, qëndroni fort dhe mos u largoni nga traditat që ju kanë mësuar, si me anë të fjalës ashtu edhe nëpërmjet letrës sonë.
¹⁶ Vetë Zoti ynë Jezus Krishti dhe Perëndia Ati ynë, që na ka dashur dhe na ka dhënë ngushëllim të përjetshëm dhe shpresë të mirë me anë të hirit,
¹⁷ i ngushëlloftë dhe i forcoftë zemrat tuaja në çdo vepër dhe fjalë të mirë.