kap 1
kap 2
kap 3

2 Selanikasve

^1
1 Pali, Silvani dhe Timoteu kishës së selanikasve në Perëndinë Atin tonë dhe Zotin Jezus Krisht:
² Paçi hir dhe paqe nga Perëndia Ati [ynë] dhe Zoti Jezus Krisht.
³ Duhet të falënderojmë gjithmonë Perëndinë për ju, vëllezër, ashtu siç duhet, sepse besimi juaj po rritet gjithnjë e më shumë dhe po shtohet shumë dashuria që secili prej jush ka për njëri-tjetrin.
⁴ Prandaj, vetë ne mburremi me ju ndër kishat e Perëndisë për këmbënguljen dhe besimin tuaj mes gjithë përndjekjeve dhe mundimeve që po duroni.
⁵ Kjo është një dëshmi që tregon gjykimin e drejtë të Perëndisë, që ju të vlerësoheni të denjë për mbretërinë e Perëndisë, për të cilën ju tani po vuani.
⁶ Sepse Perëndia është i drejtë: Ai do t’ua kthejë mundimin atyre që ju mundojnë
⁷ dhe bashkë me ne edhe juve që mundoheni do t’ju japë prehje. Kjo do të ndodhë kur të shfaqet Zoti Jezus Krisht nga qielli me engjëjt e Vet të fuqishëm në zjarrin flakërues,
⁸ dhe do të marrë shpagim kundër atyre që nuk e njohin Perëndinë dhe atyre që nuk i binden ungjillit të Zotit tonë Jezus.
⁹ Ata do të marrin si dënim shkatërrimin e përjetshëm, nuk do të shijojnë praninë e Zotit dhe lavdinë e fuqisë së Tij,
¹⁰ kur të vijë në atë ditë për të marrë lavdi ndër shenjtërit e Tij dhe për t’i bërë të mrekullohen të gjithë ata që kanë besuar, sepse ju e besuat dëshminë tonë tek ju.
¹¹ Për këtë edhe lutemi gjithmonë për ju, që Perëndia ynë t’ju bëjë të denjë për thirrjen e Tij dhe të përmbushë me fuqinë e Tij çdo synim të mirë tuajin dhe çdo vepër që nxitet nga besimi juaj,
¹² kështu që emri i Zotit tonë Jezus të fitojë lavdi në ju dhe ju në Të, sipas hirit të Perëndisë sonë dhe Zotit Jezus Krisht.