kap 1
kap 2
kap 3
kap 4
kap 5

1 Selanikasve

^5
1 Dhe sa për kohët dhe stinët, vëllezër, ju nuk keni nevojë t’ju shkruaj.
² Sepse ju vetë e dini më së miri se dita e Zotit do të vijë si kusari natën.
³ Kur të thuhet: "Paqe dhe siguri!" atëherë mbi ta do të bjerë papritur shkatërrimi, si dhimbjet e lindjes për gruan shtatzënë, dhe ata nuk do të shpëtojnë.
⁴ Por ju, vëllezër, nuk jeni në errësirë, që kjo ditë t’ju zërë në befasi si kusarin,
⁵ sepse ju të gjithë jeni bij të dritës dhe bij të ditës. Ne nuk jemi të natës as të errësirës.
⁶ Kështu pra, le të mos flemë siç bëjnë të tjerët, por të jemi syhapur dhe esëll.
⁷ Sepse ata që flenë, e bëjnë gjumin natën, dhe ata që dehen, natën dehen.
⁸ Por, meqë ne jemi të ditës, le të qëndrojmë esëll, duke veshur parzmoren e besimit dhe të dashurisë dhe duke pasur si përkrenare shpresën e shpëtimit.
⁹ Sepse Perëndia nuk na ka caktuar të përjetojmë zemëratën e Vet, por për të marrë shpëtimin nëpërmjet Zotit tonë Jezus Krisht,
¹⁰ i cili vdiq për ne, që si kur jemi zgjuar ashtu edhe fjetur, të jetojmë bashkë me Të.
¹¹ Prandaj jepini zemër njëri-tjetrit dhe ndërtoni njëri-tjetrin, siç edhe po bëni në të vërtetë.
¹² Ne kërkojmë prej jush, vëllezër, që t’i vlerësoni ata që mundohen midis jush, që ju drejtojnë në Zotin dhe që ju udhëzojnë.
¹³ T’i vlerësoni shumë lart në dashuri për shkak të punës së tyre. Të jetoni në paqe me njëri-tjetrin.
¹⁴ Ju bëjmë thirrje, vëllezër, që të qortoni dembelët, të inkurajoni zemërlëshuarit, të përkrahni të dobëtit dhe të jeni të duruar me të gjithë.
¹⁵ Shikoni që askush të mos ia kthejë tjetrit të keqen me të keqe, por gjithmonë synoni të mirën për njëri-tjetrin dhe për të gjithë.
¹⁶ Gjithmonë gëzohuni.
¹⁷ Pa pushim lutuni.
¹⁸ Për çdo gjë falënderoni, sepse ky është vullneti i Perëndisë për ju në Krishtin Jezus.
¹⁹ Frymën mos e shuani.
²⁰ Profecitë mos i përbuzni,
²¹ por çdo gjë shqyrtojeni me kujdes. Mbahuni fort pas së mirës.
²² Qëndroni larg çdo forme të së ligës.
²³ Vetë Perëndia i paqes ju shenjtëroftë ju tërësisht dhe tërë fryma, shpirti dhe trupi juaj të ruhet pa të meta në ardhjen e Zotit tonë Jezus Krisht.
²⁴ Ai që ju thërret, është besnik, dhe do t’i bëjë të gjitha këto.
²⁵ Vëllezër, lutuni [edhe] për ne.
²⁶ Përshëndetini të gjithë vëllezërit me një puthje të shenjtë.
²⁷ Ju përgjëroj me be në Zotin që letra t’u lexohet të gjithë vëllezërve.
²⁸ Hiri i Zotit tonë Jezus Krisht qoftë me ju.