kap 1
kap 2
kap 3
kap 4
kap 5

1 Selanikasve

^4
1 Më në fund, vëllezër, ne po ju lutemi dhe ju bëjmë thirrje në Zotin Jezus, që, siç mësuat prej nesh se si duhet të ecni dhe t’i pëlqeni Perëndisë (sikundër edhe po ecni), të bëheni edhe më të përkryer.
² Sepse ju e dini çfarë rregullash ju dhamë nëpërmjet Zotit Jezus.
³ Sepse ky është vullneti i Perëndisë, shenjtërimi juaj, që ju të qëndroni larg imoralitetit,
⁴ që secili prej jush të dijë si të sundojë trupin e vet në shenjtëri dhe me nder,
⁵ jo me pasione epshi, siç bëjnë kombet që nuk e njohin Perëndinë,
⁶ që askush të mos lëndojë e të mos mashtrojë vëllanë e vet në këtë punë, sepse Zoti është shpagimtari për të gjitha këto gjëra, siç ju kemi paralajmëruar tashmë dhe kemi dëshmuar.
⁷ Sepse Perëndia nuk na ka thirrur në papastërti, por në shenjtëri.
⁸ Prandaj ai që përbuz këtë, nuk përbuz njeriun, por Perëndinë që ju jep juve Frymën e Tij të Shenjtë.
⁹ Sa për dashurinë vëllazërore, ju nuk keni nevojë që t’ju shkruajnë, sepse ju vetë jeni të mësuar nga Perëndia që ta doni njëri-tjetrin.
¹⁰ Sepse në të vërtetë ju këtë e bëni ndaj të gjithë vëllezërve që janë në tërë Maqedoninë. Por ne, vëllezër, ju bëjmë thirrje që ta shtoni edhe më shumë
¹¹ dhe të përpiqeni për një jetë të qetë, të shikoni punën tuaj dhe të punoni me duart tuaja, siç ju kemi udhëzuar,
¹² që të silleni siç duhet ndaj atyre që janë jashtë dhe të mos keni nevojë për askënd.
¹³ Por nuk duam t’ju lëmë në padije, vëllezër, edhe për ata që janë në gjumë, që të mos trishtoheni, siç bëjnë ata që nuk kanë shpresë.
¹⁴ Sepse nëse besojmë se Jezusi vdiq dhe u ngjall përsëri, po ashtu Perëndia do të sjellë me Të ata që kanë rënë në gjumë në Jezusin.
¹⁵ Po jua themi sipas fjalës së Zotit, se ne që jemi gjallë, dhe do të mbetemi deri në ardhjen e Zotit, nuk do të dalim përpara atyre që kanë rënë në gjumë.
¹⁶ Sepse Vetë Zoti, me një urdhër, me zërin e kryeengjëllit dhe me trumbetën e Perëndisë, do të zbresë prej qielli dhe të vdekurit në Krishtin do të ngjallen të parët.
¹⁷ Pastaj, ne që jemi ende gjallë e që do kemi mbetur, do të rrëmbehemi bashkë me ta në një re për të takuar Zotin në ajër dhe kështu do të jemi gjithmonë bashkë me Zotin.
¹⁸ Prandaj jepini zemër njëri-tjetrit me këto fjalë.