kap 1
kap 2
kap 3
kap 4
kap 5

1 Selanikasve

^3
1 Prandaj, duke mos duruar më, na u duk më mirë të qëndronim vetëm pa njerëz të tjerë në Athinë.
² Kështu dërguam Timoteun, vëllanë tonë dhe bashkëpunëtorin e Perëndisë në ungjillin e Krishtit, që t’ju forcojë e t’ju japë zemër në besimin tuaj,
³ që askush të mos lëkundet nga këto mundime. Sepse ju vetë e dini se për këtë jemi caktuar.
⁴ Sepse, vërtet, kur ishim me ju, vazhdimisht ju thoshim se do të kalonim mundime dhe, siç e dini, ashtu ndodhi.
⁵ Prandaj, edhe unë, duke mos duruar më, dërgova një njeri që të marr vesh për besimin tuaj, sepse kisha frikë se ju kishte tunduar tunduesi dhe mundi ynë do të ishte i kotë.
⁶ Por tani Timoteu sapo u kthye te ne prej jush, duke na sjellë lajme të mira për besimin dhe dashurinë tuaj. Ai na tha që ju gjithmonë na keni kujtuar me dashuri, se keni dëshirë të madhe të na shihni, ashtu si edhe ne ju.
⁷ Prandaj, vëllezër, me gjithë nevojat dhe mundimet tona, e ndiejmë veten të ngushëlluar për ju nëpërmjet besimit tuaj.
⁸ Sepse ne tani jetojmë, po të qëndroni ju fort në Zotin.
⁹ Si mund ta falënderojmë Perëndinë për ju për të gjithë gëzimin që ndiejmë prej jush përpara Perëndisë sonë?
¹⁰ Natë e ditë lutemi pa fund që t’ju shohim dhe të plotësojmë mangësitë e besimit tuaj.
¹¹ Vetë Perëndia, Ati ynë, dhe Zoti ynë Jezus na e drejtoftë rrugën tonë për te ju.
¹² Jua shtoftë Zoti dhe jua bëftë të begatshme dashurinë për njëri-tjetrin dhe për të gjithë, ashtu siç bëjmë edhe ne për ju.
¹³ Jua bëftë zemrat të forta që të jeni pa të meta në shenjtëri përpara Perëndisë dhe Atit tonë kur të vijë Zoti ynë Jezus me të gjithë shenjtët e Vet. [Amen]