kap 1
kap 2
kap 3
kap 4
kap 5

1 Selanikasve

^1
1 Pali, Silvani dhe Timoteu kishës së selanikasve në Perëndinë Atë dhe në Zotin Jezus Krisht: Paçi hir dhe paqe.
² Falënderojmë gjithmonë Perëndinë për të gjithë ju, duke ju përmendur në lutjet tona,
³ duke kujtuar vazhdimisht përpara Perëndisë dhe Atit tonë veprën tuaj të krijuar nga besimi, mundimin e nxitur nga dashuria dhe qëndresën tuaj të frymëzuar nga shpresa në Zotin tonë Jezus Krisht.
⁴ E dimë, vëllezër, të dashur prej Perëndisë, që ju jeni të zgjedhurit e Tij,
⁵ sepse ungjilli ynë nuk erdhi te ju vetëm me fjalë, por edhe me fuqi, me Frymë të Shenjtë dhe me bindje të thellë. Ju e dini ç’lloj jete bëmë ne midis jush nga dashuria për ju.
⁶ Edhe ju u bëtë imituesit tanë dhe të Zotit, duke e pranuar fjalën në mes të mundimeve të mëdha me gëzimin e Frymës së Shenjtë.
⁷ Dhe kështu u bëtë shembull për të gjithë ata që besojnë, në Maqedoni dhe në Akai.
⁸ Sepse fjala e Zotit ushtoi prej jush jo vetëm në Maqedoni dhe në Akai, por fama e besimi juaj në Perëndinë është përhapur kudo, kështu që ne nuk kemi nevojë të flasim më për këtë.
⁹ Sepse vetë ata tregojnë për ne, se si na pritët dhe si ju u kthyet nga idhujt te Perëndia për t’i shërbyer Perëndisë së gjallë dhe të vërtetë
¹⁰ dhe për të pritur Birin e Tij nga qiejt, të cilin Ai e ngjalli prej të vdekurve, Jezusin, që na shpëton nga zemërimi që po vjen.