kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^8
1 Tani pra, nuk ka asnjë dënim për ata që janë në Krishtin Jezus.
² Sepse ligji i Frymës së jetës në Krishtin Jezus të ka çliruar nga ligji i mëkatit dhe i vdekjes.
³ Sepse atë që ishte e pamundur për Ligjin, meqë mishi e bënte të pafuqishëm, e bëri të mundur Perëndia: duke dërguar Birin e Vet të ngjashëm me mishin mëkatar dhe si flijim për mëkatin, Ai dënoi mëkatin në mish,
⁴ që drejtësia e Ligjit të përmbushej tek ne që nuk ecim sipas mishit, por sipas Frymës.
⁵ Sepse ata që janë sipas mishit e kanë mendjen te punët e mishit, por ata që janë sipas Frymës, te punët e Frymës.
⁶ Sepse dëshirat e mishit sjellin vdekje, kurse dëshirat e Frymës sjellin jetë dhe paqe,
⁷ sepse dëshirat e mishit janë në armiqësi ndaj Perëndisë, meqë nuk i nënshtrohen ligjit të Perëndisë, dhe as që munden.
⁸ Ata që janë në mish nuk mund t’i pëlqejnë Perëndisë.
⁹ Megjithatë ju nuk jeni në mish por në Frymë, nëse Fryma e Perëndisë vërtet banon tek ju. Nëse dikush nuk e ka Frymën e Krishtit, ky nuk i përket Atij.
¹⁰ Nëse Krishti është në ju, nga njëra anë trupi është i vdekur për shkak të mëkatit, por nga ana tjetër fryma është e gjallë për hir të drejtësisë.
¹¹ Nëse Fryma e Atij që ngjalli Jezusin prej të vdekurve banon në ju, Ai që ngriti Krishtin prej të vdekurve do t’u japë jetë edhe trupave tuaj të vdekshëm nëpërmjet Frymës së Tij, që banon në ju.
¹² Kështu pra, o vëllezër, nuk i jemi borxhlinj mishit, që të rrojmë sipas mishit,
¹³ sepse nëse jetoni sipas mishit, keni për të vdekur; por nëse me anë të Frymës i bëni të vdesin veprat e trupit, do të jetoni.
¹⁴ Sepse të gjithë ata që udhëhiqen nga Fryma e Perëndisë, janë bij të Perëndisë.
¹⁵ Sepse ju nuk keni marrë frymë robërimi që të keni përsëri frikë, por keni marrë frymë birësimi, me anë të së cilës ne thërrasim: "Aba, o Atë!"
¹⁶ Fryma Vetë dëshmon me frymën tonë që ne jemi fëmijë të Perëndisë
¹⁷ dhe, nëse jemi fëmijë, jemi gjithashtu trashëgimtarë, trashëgimtarë të Perëndisë dhe bashkëtrashëgimtarë me Krishtin, nëse vërtet vuajmë bashkë me Të që të marrim lavdi së bashku.
¹⁸ Mendoj se vuajtjet e kohës së tanishme nuk ia vlejnë të krahasohen me lavdinë që ka për t’u zbuluar tek ne.
¹⁹ Sepse krijimi pret me padurim të zbulohen bijtë e Perëndisë.
²⁰ Sepse krijimi iu nënshtrua kotësisë, jo në mënyrë të vullnetshme, por për shkak të Atij që e nënshtroi, me shpresë
²¹ se edhe vetë krijimi do të çlirohet nga robëria e prishjes dhe do të gëzojë lirinë e lavdisë së fëmijëve të Perëndisë.
²² Sepse ne e dimë që deri tani i gjithë krijimi bashkë ka qenë duke rënkuar si në dhimbjet e lindjes.
²³ Dhe jo vetëm krijimi, por edhe ne vetë, që kemi frytin e parë të Frymës, madje ne vetë rënkojmë me veten tonë, duke pritur me padurim birësimin, shpengimin e trupit tonë.
²⁴ Sepse ne shpëtuam në shpresë, por ajo që shpresohet, po të shihet nuk është shpresë; sepse a shpreson njeri atë që sheh?
²⁵ Por nëse shpresojmë për atë që nuk shohim, atëherë e presim atë me durim.
²⁶ Po ashtu edhe Fryma na ndihmon në dobësinë tonë; sepse ne nuk dimë për çfarë të lutemi ashtu siç duhet, por Vetë Fryma ndërhyn për ne me rënkime që nuk shprehen dot.
²⁷ Ai që heton zemrat tona e di cila është mendja e Frymës, sepse Ai ndërhyn për shenjtërit sipas vullnetit të Perëndisë.
²⁸ E dimë se Perëndia vepron në gjithçka për të mirën e atyre që e duan Atë, për ata që janë thirrur sipas qëllimit të Tij.
²⁹ Sepse ata që Ai ka njohur që më parë, i ka paracaktuar që të jenë në përputhje me shëmbëlltyrën e Birit të Vet, që Ai të jetë i parëlindur ndër shumë vëllezër.
³⁰ Prandaj, ata që Ai ka paracaktuar, këta edhe i ka thirrur; dhe ata që ka thirrur, këta edhe i ka shfajësuar; dhe ata që ka shfajësuar, këtyre u ka dhënë edhe lavdi.
³¹ Atëherë çfarë do të themi për këto gjëra? Nëse Perëndia është për ne, kush mund të jetë kundër nesh?
³² Ai që nuk kurseu Birin e Vet, por e dorëzoi për ne të gjithë, si nuk do të na japë, bashkë me Të, çdo gjë falas?
³³ Kush do të ngrejë padi kundër të zgjedhurve të Perëndisë? Perëndia është Ai që shfajëson.
³⁴ Kush është ai që do t’i dënojë? Krishti Jezus, Ai që vdiq dhe për më tepër që u ngjall, është në krahun e djathtë të Perëndisë, i cili edhe ndërhyn për ne.
³⁵ Kush do të na shkëpusë ne nga dashuria e Krishtit? Vallë mundimi, apo ankthi, apo përndjekja, apo uria, apo të zhveshurit, apo rreziku, apo shpata?
³⁶ Ashtu siç është shkruar: "Për hirin Tënd ndeshemi me vdekjen tërë ditën; u trajtuam si dele për t’u therur."
³⁷ Por në të gjitha këto gjëra ne dalim më shumë se fitimtarë nëpërmjet Atij që na deshi ne.
³⁸ Sepse jam i bindur që as vdekja, as jeta, as engjëjt, as krerët, as gjërat e tanishme, as ato që do të vijnë, as fuqitë,
³⁹ as lartësia, as thellësia, as ndonjë gjë tjetër e krijuar, nuk do të jetë në gjendje të na ndajë nga dashuria e Perëndisë, që është në Krishtin Jezus, Zotin tonë.