kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^6
1 Çfarë do të themi pra? A të vazhdojmë në mëkat, që hiri të shtohet me bollëk?
² Kurrë mos qoftë! Si do të jetojmë në mëkat ne që jemi të vdekur ndaj mëkatit?
³ Apo nuk e dini se të gjithë ne që u pagëzuam në Krishtin Jezus jemi pagëzuar në vdekjen e Tij?
⁴ Prandaj u varrosëm me Të nëpërmjet pagëzimit, në vdekje, që ashtu si u ngjall Krishti prej të vdekurve nëpërmjet lavdisë së Atit, po ashtu edhe ne të ecim në një jetë të re.
⁵ Sepse po të bashkohemi me Të në një vdekje të ngjashme me të Tijën, po ashtu do të jemi edhe në ngjalljen e Tij.
⁶ Sepse e dimë që njeriu ynë i vjetër u kryqëzua bashkë me Të, që të zhdukej trupi i mëkatit, që ne të mos ishim më skllevër të mëkatit,
⁷ sepse cilido që ka vdekur është çliruar nga mëkati.
⁸ Nëse kemi vdekur me Krishtin, ne besojmë se gjithashtu do të jetojmë bashkë me Të.
⁹ Sepse e dimë që Krishti, pasi u ngjall prej të vdekurve, nuk vdes më kurrë. Vdekja nuk sundon më mbi Të.
¹⁰ Sepse vdekja që Ai pësoi, ishte vdekje ndaj mëkatit, njëherë e përgjithmonë; por jetën që Ai jeton, e jeton për Perëndinë.
¹¹ Kështu edhe ju llogariteni veten tuaj të vdekur ndaj mëkatit, por të gjallë për Perëndinë në Krishtin Jezus.
¹² Prandaj mos e lini mëkatin të mbretërojë në trupin tuaj të vdekshëm, që t’i bindeni epsheve të tij,
¹³ as mos ia jepni mëkatit gjymtyrët tuaja si mjete paudhësie; por jepjani veten tuaj Perëndisë si të ngjallur nga të vdekurit dhe gjymtyrët tuaja si armë drejtësie për Perëndinë.
¹⁴ Sepse mëkati nuk do të sundojë tek ju, sepse ju nuk jeni nën ligj, por nën hir.
¹⁵ Çfarë atëherë? A të bëjmë mëkate, meqë nuk jemi nën ligj por nën hir? Kurrë mos qoftë!
¹⁶ A nuk e dini se kur ia paraqisni veten tuaj dikujt si skllevër për t’iu bindur, skllevër të atij që i bindeni do të jeni, qoftë të mëkatit, që çon në vdekje ose të bindjes që çon në drejtësi?
¹⁷ Por, qoftë falënderuar Perëndia që, megjithëse ishit skllevër të mëkatit, me zemër iu bindët atij lloj mësimi që ju ishte dhënë,
¹⁸ dhe duke u çliruar prej mëkatit, ju u bëtë skllevër të drejtësisë.
¹⁹ Po flas siç flasin njerëzit për shkak të dobësisë së mishit tuaj. Sepse ashtu si i vinit gjymtyrët tuaja në shërbim të papastërtisë dhe paudhësisë që çon në paudhësi gjithnjë në rritje, po ashtu vërini gjymtyrët tuaja në shërbim të drejtësisë, që çon në shenjtërim.
²⁰ Sepse kur ishit skllevër të mëkatit, ishit të lirë ndaj drejtësisë.
²¹ Pra, ç’fitim kishit ju atëherë prej atyre gjërave për të cilat tani keni turp? Sepse fundi i këtyre është vdekja.
²² Por tani, pasi u liruat nga mëkati dhe u bëtë shërbëtorë të Perëndisë, keni frytin tuaj që çon në shenjtërim dhe si rezultat jetën e amshuar.
²³ Sepse paga e mëkatit është vdekja, ndërsa dhurata e Perëndisë është jeta e amshuar në Krishtin Jezus, Zotin tonë.