kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^3
1 Cila është pra, përparësia e judeut? Ose ç’vlerë ka rrethprerja?
² E madhe, në çdo drejtim. Para së gjithash, sepse atyre iu besuan ato që ka thënë Perëndia.
³ E ç’rëndësi ka pastaj nëse disa nuk besojnë? A mos vallë mosbesimi i tyre do ta shfuqizojë besnikërinë e Perëndisë?
⁴ Kurrë mos qoftë! Përkundrazi, qoftë Perëndia i vërtetë dhe çdo njeri gënjeshtar, siç është shkruar: "Që të shfajësohesh në fjalët e Tua dhe të dalësh fitimtar kur të gjykohesh."
⁵ Por nëse padrejtësia jonë nxjerr në pah drejtësinë e Perëndisë, ç’do të themi? Mos vallë Perëndia që shfren mbi ne zemërimin e Vet është i padrejtë? (Po flas si njeri.)
⁶ Kurrë mos qoftë! Përndryshe si do ta gjykojë Perëndia botën?
⁷ Por nëse me gënjeshtrën time ngrihet lart e vërteta e Perëndisë për lavdinë e Tij, përse gjykohem edhe unë ende si mëkatar?
⁸ Pse të mos themi, (siç na shajnë dhe siç shpifin disa sikur ne thokemi) "Të bëjmë të këqija, që të vijnë të mirat."? Dënimi i tyre është i drejtë.
⁹ Qysh pra? A jemi ne më të mirë? Aspak! Sepse ne sapo i kemi akuzuar si judenjtë edhe grekët se të gjithë janë nën mëkat;
¹⁰ siç është shkruar: "Nuk ka njeri të drejtë, as edhe një;
¹¹ nuk ka njeri që të kuptojë, nuk ka njeri që të kërkojë Perëndinë.
¹² Të gjithë kanë dalë nga udha, së bashku u bënë të padobishëm. Nuk ka njeri që të bëjë mirësi, nuk ka as edhe një.
¹³ Gurmazin e kanë si varr të hapur; me gjuhën e tyre vazhdimisht mashtrojnë, helm nepërkash kanë nën buzë.
¹⁴ Gojën e kanë plot mallkim e hidhësi.
¹⁵ Këmbët i kanë të shpejta për të derdhur gjak,
¹⁶ Rrënim dhe mjerim ka në udhët e tyre
¹⁷ dhe udhën e paqes nuk e kanë njohur.
¹⁸ Nuk ekziston frikë Perëndie para syve të tyre."
¹⁹ Por ne e dimë se Ligji, çfarëdo që të thotë, u flet atyre që janë nën Ligj, që çdo gojë të mbyllet dhe e gjithë bota të vihet nën gjykimin para Perëndisë;
²⁰ sepse nga veprat e Ligjit asnjë mish nuk do të shfajësohet para Tij; përkundrazi, nëpërmjet Ligjit arrihet njohja e mëkatit.
²¹ Por tani drejtësia e Perëndisë është shfaqur pavarësisht nga Ligji dhe për të dëshmon Ligji dhe Profetët.
²² Drejtësia e Perëndisë vjen nëpërmjet besimit në Jezus Krishtin, për të gjithë ata që besojnë. Nuk ka dallim;
²³ sepse të gjithë kanë mëkatuar dhe u mungon lavdia e Perëndisë
²⁴ dhe po shfajësohen falas nga hiri i Tij nëpërmjet shpengimit që erdhi nëpërmjet Krishtit Jezus.
²⁵ Perëndia e paraqiti Atë si shpërblesë nëpërmjet besimit në gjakun e Tij, për të treguar drejtësinë e Tij, sepse durimi i Perëndisë i kishte kaluar pa dënuar mëkatet e kryera më parë,
²⁶ E bëri këtë për të shfaqur drejtësinë e vet në kohën e tanishme, që Ai të jetë i drejtë dhe të shfajësojë atë që ka besim në Jezusin.
²⁷ Ku është pra mburrja? Përjashtohet. Me anë të cilit ligj? Të veprave? Jo, por nëpërmjet ligjit të besimit.
²⁸ Ne mendojmë se njeriu shfajësohet me anë të besimit jashtë veprave të Ligjit.
²⁹ Apo Perëndia është vetëm i judenjve? A nuk është Ai edhe i kombeve? Po, edhe i kombeve,
³⁰ meqenëse është një Perëndi i vetëm, i cili do të shfajësojë atë që është rrethprerë prej besimit dhe atë që nuk është rrethprerë nëpërmjet po atij besimi.
³¹ Atëherë a ia heqim ne vlerën Ligjin nëpërmjet besimit? Kurrë mos qoftë! Përkundrazi, e përforcojmë Ligjin.