kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^2
1 Prandaj, ti o njeri, kushdo qofsh që gjykon një tjetër, nuk mund të jesh i shfajësuar, sepse duke gjykuar tjetrin, ti dënon veten tënde; sepse ti që gjykon i bën vetë po ato gjëra.
² Tani, ne e dimë se gjykimi i Perëndisë mbi ata që bëjnë të këtilla punë bazohet në të vërtetën.
³ A e mendon, ti o njeri, që gjykon ata që bëjnë të këtilla gjëra në një kohë që edhe ti vetë bën po ato, se ti do t’i shpëtosh gjykimit të Perëndisë?
⁴ Apo nuk përfill pasurinë e mirësisë së Tij, të durimit e të mundimit të madh, pa e ditur se mirësia e Perëndisë të çon drejt pendimit?
⁵ Por për shkak të kryeneçësisë tënde dhe të zemrës së papenduar, mbledh për vete zemëratë për ditën e zemërimit të Perëndisë, kur do të zbulohet gjykimi i drejtë i Tij.
⁶ Perëndia do t’ia kthejë secilit sipas veprave të tij.
⁷ Atyre, që kërkojnë lavdi, nder dhe pavdekësi duke ngulmuar për të bërë mirë, do t’u japë jetë të amshuar,
⁸ por atyre, që janë egoistë dhe nuk i binden së vërtetës, por i binden padrejtësisë, do t’u japë zemëratë dhe indinjatë.
⁹ Mundim dhe ankth do të ketë për çdo shpirt njeriu që bën të keqen, më parë për judeun e pastaj për grekun,
¹⁰ por lavdi, nder dhe paqe për këdo që bën mirë, judeut më parë e pastaj grekut.
¹¹ Sepse Perëndia nuk i mban anën askujt.
¹² Sepse të gjithë ata që kanë mëkatuar pa Ligj, po ashtu pa Ligj do të zhduken dhe të gjithë ata që kanë mëkatuar nën Ligjin, prej Ligjit do të gjykohen.
¹³ Sepse të drejtë para Perëndisë nuk janë ata që e dëgjojnë Ligjin, por janë pikërisht ata që e zbatojnë Ligjin që do të shfajësohen.
¹⁴ Sepse kur kombet, që nuk kanë Ligj, bëjnë prej natyre gjërat e Ligjit, këta janë ligj për veten e tyre, edhe pse nuk kanë ligj.
¹⁵ Ata tregojnë se vepra e Ligjit është shkruar në zemrat e tyre, ku ndërgjegjja e tyre dëshmon dhe mendimet midis njëri-tjetrit i padisin ose edhe i mbrojnë.
¹⁶ Kjo do të ndodhë në ditën kur Perëndia, siç e shpall ungjilli im, do të gjykojë të fshehtat e njerëzve nëpërmjet Krishtit Jezus.
¹⁷ Por nëse ti mban emrin "jude", nëse mbështetesh në Ligjin dhe mburresh me Perëndinë,
¹⁸ nëse e di vullnetin e Tij dhe miraton ato që janë thelbësore, duke u udhëzuar nga Ligji,
¹⁹ nëse je i bindur se ti vetë u prin të verbërve, se je dritë për ata që janë në errësirë,
²⁰ edukues i të marrëve, mësues i të miturve, duke pasur në Ligjin mishërimin e dijes dhe të së vërtetës –
²¹ ti, pra, që mëson të tjerët, a nuk mëson veten tënde? Ti që predikon të mos vjedhin, a vjedh?
²² Ti që thua të mos shkelet kurora, a kryen tradhëti bashkëshortore? Ti që urren idhujt, a i grabit tempujt?
²³ Ti që mburresh me Ligjin, a e çnderon Perëndinë duke shkelur Ligjin?
²⁴ Sepse siç është shkruar: "Emri i Perëndisë shahet ndër kombet për shkakun tuaj."
²⁵ Sepse, vërtet, rrethprerja sjell dobi nëse zbaton Ligjin, por nëse je shkelës i Ligjit, rrethprerja jote është njësoj sikur të mos ishte bërë.
²⁶ Pra, nëse ai që nuk është rrethprerë i ruan urdhëresat e Ligjit, a nuk do të konsiderohet si i rrethprerë, edhe pse nuk është i tillë?
²⁷ Ai që nga natyra nuk është rrethprerë por që përmbush Ligjin, do të të gjykojë ty, që megjithëse e ke Ligjin e shkruar dhe rrethprerjen, je shkelës i Ligjit.
²⁸ Sepse nuk është jude ai që duket në pamje të jashtme; as rrethprerje nuk është ajo që duket në mish.
²⁹ Jude është ai që është përbrenda dhe rrethprerje është ajo e zemrës, sipas frymës, jo sipas ligjit të shkruar; lëvdata e një njeriu të tillë nuk vjen prej njerëzve por prej Perëndisë.