kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^15
1 Ne që jemi të fortë e kemi për detyrë të jemi të duruar me dobësitë e atyre që nuk janë të fortë dhe jo t’i bëjmë qejfin vetes.
² Le ta kënaqë secili prej nesh të afërmin e vet për të mirën e tij, për ngritjen e tij.
³ Sepse edhe Krishti nuk u përpoq të kënaqë Vetveten, por siç është shkruar: "Fyerjet e atyre që të shajnë Ty, ranë mbi Mua."
⁴ Sepse të gjitha sa janë shkruar më parë u shkruan për mësimin tonë, që nëpërmjet durimit dhe ngushëllimit të Shkrimeve të kemi shpresë.
⁵ Ju dhëntë Perëndia i durimit dhe i ngushëllimit frymën e ndjenjave të përbashkëta me njëri-tjetrin sipas Krishtit Jezus,
⁶ që me një mendje dhe me një gojë t’i jepni lavdi Perëndisë dhe Atit të Zotit tonë Jezus Krishtit.
⁷ Prandaj pranojeni njëri-tjetrin, siç ju ka pranuar Krishti ju, për t’i sjellë lavdi Perëndisë.
⁸ Them se Krishti u bë shërbëtor i të rrethprerëve për të vërtetën e Perëndisë, për të vërtetuar premtimet që u janë dhënë etërve,
⁹ dhe që kombet t’i japin lavdi Perëndisë për mëshirën e Tij, siç është shkruar: "Prandaj Ty do të lëvdoj ndër kombet; emrit Tënd do t’i këndoj himne."
¹⁰ Dhe thotë përsëri: "Gëzohuni, o kombe, me popullin e Tij."
¹¹ Dhe përsëri: "Lëvdoni Zotin, të gjitha ju o kombe; le t’i thurin Atij lëvdata të gjithë popujt."
¹² Dhe përsëri Isaia thotë: "Do të bulojë filizi i Jeseut, Ai që do të ngrihet për të sunduar mbi kombet; tek Ai do të shpresojnë kombet."
¹³ Ju mbushtë Perëndia i shpresës gjithë gëzim dhe paqe në besim, që të mbushulloni në shpresë me anë të fuqisë së Frymës.
¹⁴ Dhe sa për ju, o vëllezërit e mi, unë vetë jam i bindur se ju jeni plot mirësi, të mbushur plot me dije dhe të aftë për të këshilluar edhe njëri-tjetrin.
¹⁵ Por ju kam shkruar me guxim për disa çështje, që t’ju rikujtoj, për shkak të hirit që m’u dha nga Perëndia,
¹⁶ për të qenë shërbyes i Krishtit Jezus ndër kombet, duke ushtruar shërbimin e shenjtë të ungjillit të Perëndisë, që kombet të bëhen një mblatim i pranueshëm, i shenjtëruar nga Fryma e Shenjtë.
¹⁷ Kam pra, me se të mburrem në Krishtin Jezus në punët që lidhen me Perëndinë.
¹⁸ Sepse nuk do të kisha guxim të flisja për ndonjë gjë që Krishti nuk ka bërë nëpërmjet meje, që kombet të binden me fjalë dhe me vepra,
¹⁹ me fuqinë e shenjave dhe të mrekullive, me fuqinë e Frymës [së Perëndisë]. Kështu, që nga Jeruzalemi e rrethinat deri në Iliri kam vënë në jetë predikimin e ungjillit të Krishtit.
²⁰ Kështu kam pasur synim kryesor predikimin e ungjillit, jo aty ku njihet emri i Krishtit, për të mos ndërtuar mbi themelet e dikujt tjetër,
²¹ por siç është shkruar: "Ata, të cilëve Ai nuk u është shpallur, do të shohin dhe ata që nuk kanë dëgjuar, do të kuptojnë."
²² Prandaj, shpeshherë kam qenë penguar që të vij tek ju.
²³ Por, tani që nuk ka më vend në këto anë, dhe, meqë ka vitë që më ka marrë malli t’ju takoj,
²⁴ kur të shkoj në Spanjë, shpresoj t’ju takoj gjatë rrugës dhe se do të më ndihmoni të shkoj në atë vend, pasi të jem çmallur paksa me ju.
²⁵ Por tani po shkoj në Jeruzalem për t’u shërbyer shenjtërve.
²⁶ Sepse Maqedonisë dhe Akaisë u pëlqeu të japin një ndihmesë për të varfrit ndër shenjtërit në Jeruzalem.
²⁷ Kështu u pëlqeu të bëjnë dhe ata janë borxhlinj ndaj tyre. Sepse meqë kombet kanë marrë pjesë në të mirat e tyre shpirtërore, atëherë u janë borxhlinj që t’u shërbejnë atyre edhe në nevojat materiale.
²⁸ Prandaj, pasi të kem mbaruar këtë detyrë dhe pasi t’ua kem dorëzuar këtë fryt, do të largohem për në Spanjë duke kaluar nga ju.
²⁹ Dhe e di se kur të vij tek ju, do të vij me bekimin e plotë të Krishtit.
³⁰ Po ju lutem, o vëllezër, nëpërmjet Zotit tonë Jezus Krishtit dhe dashurisë së Frymës, të luftoni bashkë me mua, duke iu lutur Perëndisë,
³¹ që të çlirohem prej atyre në Jude që nuk besojnë dhe që shërbesa ime në Jeruzalem të jetë e pranueshme për shenjtërit,
³² që të vij me gëzim te ju me vullnetin e Perëndisë dhe të pushoj bashkë me ju.
³³ Perëndia i paqes qoftë me ju të gjithë. Amen.