kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^12
1 Po ju bëj thirrje pra, o vëllezër, për dhembshurinë e Perëndisë, që t’i paraqitni trupat tuaj si një flijim të gjallë e të shenjtë, të pëlqyeshëm për Perëndinë; kjo është shërbesa juaj shpirtërore.
² Mos u përshtatni me mendësinë e kësaj botë, por shndërrohuni, duke ripërtërirë mendjen tuaj, që të provoni cili është vullneti i Perëndisë – çka është e mirë, e pëlqyer dhe e përsosur për Të.
³ Sepse nëpërmjet hirit që më është dhënë mua, i them secilit prej jush që të mos e mbajë veten më lart sesa duhet, por ta vlerësojë veten me gjykim të kthjellët, siç ia ka dhënë Perëndia secilit masën e besimit.
⁴ Sepse ashtu siç kemi shumë gjymtyrë në një trup, ku të gjitha gjymtyrët nuk kryejnë të njëjtin veprim,
⁵ po ashtu ne, që jemi shumë, jemi një trup në Krishtin dhe secili nga ne është gjymtyrë e njëri-tjetrit.
⁶ Kemi dhunti të ndryshme sipas hirit që na është dhënë. Kush ka dhuntinë e profecisë, le ta ushtrojë sipas masës së besimit;
⁷ kush ka një shërbesë, të merret me shërbesën; kush ka mësimin, të merret me mësimin;
⁸ kush ka këshillimin, të merret me këshillimin. Ai që jep, të japë me bujari; ai që kryeson, të kryesojë me zell, ai që mëshiron, të mëshirojë buzagaz.
⁹ Le të jetë dashuria pa hipokrizi. Urreni të ligën; mos iu ndani së mirës.
¹⁰ Të jeni të përzemërt me njëri-tjetrin në dashuri vëllazërore; ta vini njëri-tjetrin mbi veten me nderim.
¹¹ Sa për zellin të jeni të papërtuar, sa për frymën të jeni të zjarrtë, duke i shërbyer Zotit.
¹² Të jeni të gëzuar në shpresë, të duruar në mundime, këmbëngulës në lutje,
¹³ të gatshëm për të plotësuar nevojat e shenjtërve, zbatoni mikpritjen.
¹⁴ Bekoni ata që ju përndjekin; bekoni dhe mos mallkoni.
¹⁵ Gëzohuni me ata që gëzojnë dhe vajtoni me ata që vajtojnë.
¹⁶ Të jeni në një mendje me njëri-tjetrin; mos e mbani veten lart, por shoqërohuni me të përvuajturit. Mos e mbani veten për të mençur.
¹⁷ Askujt mos ia ktheni të keqen me të keqe. Më parë përpiquni të bëni të mira para të gjithë njerëzve.
¹⁸ Po të jetë e mundur, aq sa varet prej jush, bëni paqe me të gjithë njerëzit.
¹⁹ Mos merrni hak për veten tuaj, të dashurit e mi, por lini vend për zemërimin e Perëndisë, sepse është shkruar: "Hakmarrja është Imja, Unë do ta jap shpagimin", thotë Zoti.
²⁰ "Por po të ketë uri armiku yt, jepi të hajë dhe po të ketë etje, jepi të pijë; sepse duke bërë këtë, thëngjij të ndezur do të grumbullosh mbi kokën e tij."
²¹ Mos u mposht prej së keqes, por mposhte të keqen me të mirën.