kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16

Romakeve

^10
1 Vëllezër, dëshira e zemrës sime dhe lutja ime që i drejtoj Perëndisë është për shpëtimin e tyre.
² Sepse bëj dëshmi për ta se kanë zell për Perëndinë, por jo sipas njohjes.
³ Sepse, duke mos e njohur drejtësinë e Perëndisë dhe duke kërkuar të vendosin drejtësinë e vet, ata nuk i janë nështruar drejtësisë së Perëndisë.
⁴ Sepse Krishti është caku i ligjit në mënyrë që të ketë drejtësi për këdo që beson.
⁵ Ja si shkruan Moisiu për drejtësinë që vjen nga ligji: "Njeriu që i bën këto gjëra do të jetojë me anë të tyre."
⁶ Por drejtësia që vjen nga besimi thotë kështu: "Mos thuaj në zemrën tënde: ‘Kush do të ngjitet në qiell?’ (domethënë, ta zbresë Krishtin),
⁷ ose ‘Kush do të zbresë në humnerë?’ (domethënë, ta ngjallë Krishtin prej të vdekurve)."
⁸ Por çfarë thotë? "Fjala është pranë teje, në gojën tënde dhe në zemrën tënde" domethënë, fjala e besimit që predikojmë,
⁹ se po ta pohosh me gojën tënde Zotin Jezus dhe të besosh në zemrën tënde se Perëndia e ngriti Atë prej të vdekurve, do të shpëtohesh.
¹⁰ Sepse me zemër besohet për të fituar drejtësi dhe me gojë pohohet për të marrë shpëtim.
¹¹ Sepse Shkrimi thotë: "Kushdo që beson tek Ai nuk do të turpërohet."
¹² Sepse nuk ka dallim midis judeut dhe grekut; sepse i njëjtë është Zoti i të gjithëve, shumë i pasur për të gjithë ata që e thërrasin Atë për ndihmë.
¹³ Sepse "Kushdo që do të thërrasë emrin e Zotit, do të shpëtohet."
¹⁴ Si do ta thërrasin për ndihmë Atë në të cilin nuk kanë besuar? Si do të besojnë në Atë të cilin nuk e kanë dëgjuar? Si do ta dëgjojnë pa ua predikuar dikush?
¹⁵ Si do të predikojnë po të mos jenë dërguar? Siç është shkruar: "Sa të bukura janë këmbët e atyre që shpallin lajmin e mirë!"
¹⁶ Por jo të gjithë e pranuan lajmin e mirë; sepse Isaia thotë: "Zot, kush e besoi atë që thamë ne?"
¹⁷ Pra, besimi vjen duke dëgjuar dhe dëgjimi nëpërmjet fjalës së Krishtit.
¹⁸ Por pyes, mos vallë nuk dëgjuan? Përkundrazi; "Zëri i tyre u përhap në gjithë tokën dhe fjalët e tyre në skajet e botës."
¹⁹ Por pyes, mos vallë Izraeli nuk e dinte? I pari thotë Moisiu: "Unë do t’ju bëj ziliqarë për atë që nuk është komb, me një komb të pamend do t’ju inatos."
²⁰ Isaia ka guxim dhe thotë: "Mua më gjetën ata që nuk më kërkonin, Unë iu shfaqa atyre që nuk pyesnin për Mua."
²¹ Por për Izraelin thotë: "Tërë ditën ia kam shtrirë duart një populli të pabindur dhe kokëfortë."