kap 1
kap 2
kap 3

2 Pjetri

^3
1 Kjo tani, të dashurit e mi, është e dyta letër që ju shkruaj dhe në të dyja dua t’ju nxit mendjen tuaj për t’ju kujtuar,
² që të mos harroni fjalët që kanë thënë më parë profetët e shenjtë dhe urdhërimin e Zotit e të Shpëtimtarit, që kanë lënë apostujt tuaj.
³ Para së gjithash ta dini se në ditët e fundit do të vijnë përqeshësit që do t’ju tallin, duke shkuar pas epsheve të tyre.
⁴ Do të thonë: "Ku është premtimi i ardhjes së Tij? Sepse që kur etërit tanë mbyllën sytë, gjithçka vazhdon siç ka qenë që prej fillimit të krijimit."
⁵ Por këta harrojnë me vetëdije, se nëpërmjet fjalës së Perëndisë ekzistonin prej kohësh qiejt dhe toka u formua prej ujit dhe nëpërmjet ujit,
⁶ nëpërmjet të cilit bota e atëhershme u shkatërrua, duke u përmbytur me ujë.
⁷ Qiejt dhe toka që janë sot, janë ruajtur nëpërmjet fjalës së Tij për zjarr për ditën e gjykimit dhe të shkatërrimit të njerëzve të papërshpirtshëm.
⁸ Por mos e lini t’ju shpëtojë ky fakt, të dashurit e mi, se për Zotin një ditë është si një mijë vjet dhe një mijë vjet janë si një ditë.
⁹ Zoti nuk vonon në premtimin e Vet, siç e kuptojnë disa vonesën, por është i durueshëm me ju. Dëshira e Tij është që asnjë të mos humbasë, por të gjithë të vijnë te pendimi.
¹⁰ Por dita e Zotit do të vijë si një kusar. Në atë ditë qiejt do të zhduken me uturimë, elementet do të shkatërrohen nga zjarri dhe toka dhe çdo gjë në të do të dalin zbuluar.
¹¹ Meqë të gjitha këto do të shpërbëhen në këtë mënyrë, ç’lloj njerëzish duhet të jeni? Ju duhet të bëni jetë të shenjtë dhe të përshpirtshme,
¹² duke pritur dhe duke u dëshiruar për ardhjen e ditës së Perëndisë, për shkak të së cilës qiejt do të shkrihen nga zjarri dhe elementet do të digjen dhe do të bëhen shkrumb e hi!
¹³ Por ne, sipas premtimit të Tij, presim qiej të rinj dhe tokë të re, në të cilat banon drejtësia.
¹⁴ Prandaj, të dashurit e mi, duke qenë në pritje të këtyre gjërave, bëni çdo përpjekje që Ai t’ju gjejë në paqe me Të, të panjollosur e të paqortueshëm.
¹⁵ Durimin e madh të Zotit tonë ta quani shpëtim, ashtu si ju shkroi vëllai ynë i dashur Pal, sipas mençurisë që iu dha,
¹⁶ si edhe në të gjitha letrat e tij, ku foli për këto gjëra. Në letrat e tij ka disa gjëra që janë të vështira për t’u kuptuar, të cilat i shtrembërojnë ata që janë të pamësuar dhe të paqëndrueshëm, siç bëjnë edhe me pjesën tjetër të Shkrimit, për shkatërrimin e vetes së tyre.
¹⁷ Prandaj, ju, të dashur, meqë tashmë e dini këtë, hapni sytë, se mos ju çojnë të paudhët në rrugë të gabuar dhe shkisni nga qëndrimi juaj i patundur.
¹⁸ Por rrituni në hirin dhe njohjen e Zotit tonë dhe Shpëtimtarit Jezus Krisht. Atij i qoftë lavdia si tani edhe në ditën e përjetësisë. [Amen.]