kap 1
kap 2
kap 3

2 Pjetri

^2
1 Por në popull dolën profetë të rremë, siç do të ketë edhe midis jush mësues të rremë, të cilët do të fusin fshehurazi herezi shkatërruese, madje edhe duke mohuar Zotin që i ka blerë, duke sjellë kështu mbi vete shkatërrim të shpejtë.
² Shumë do t’i ndjekin shthurjet e tyre dhe për shkak të tyre do të shahet rruga e së vërtetës.
³ Me pangopësinë e tyre do t’ju shfrytëzojnë duke përdorur fjalë të sajuara. Dënimi i tyre ka kohë që është gati dhe shkatërrimi i tyre nuk ka qenë në gjumë.
⁴ Sepse nëse Perëndia nuk i kurseu engjëjt kur ata mëkatuan, por i hodhi në ferr dhe i futi në biruca terri për t’u mbajtur për gjykim;
⁵ nëse nuk kurseu botën e lashtë, por e ruajti Noen, vetë i tetë, këtë predikues të drejtësisë, kur i solli përmbytjen botës së të pafeve;
⁶ nëse i dënoi qytetet e Sodomës dhe të Gomorrës duke i shkatërruar e duke i kthyer në hi dhe i bëri shembull për ata që kanë ndër mend të bëjnë një jetë të papërshpirtshme;
⁷ nëse shpëtoi Lotin e drejtë, të sfilitur nga sjellja e shthurur e njerëzve të paudhë,
⁸ (sepse këtij njeriu të drejtë, me çka pa e dëgjoi, duke banuar midis tyre, nga dita në ditë i torturohej shpirti i tij i drejtë për veprat e tyre të paudha)
⁹ nëse është kështu, atëherë Zoti e di si t’i shpëtojë të përshpirtshmit nga tundimi dhe t’i mbajë të padrejtët për t’i dënuar në ditën e gjykimit,
¹⁰ sidomos ata që shkojnë pas epsheve të fëlliqura të mishit dhe nuk e përfillin pushtetin. Ata janë kokëkrisur, arrogantë e nuk druhen të shajnë fuqitë qiellore,
¹¹ ndërsa engjëjt, megjithëse janë më të fortë e më të fuqishëm, nuk hedhin kundër tyre akuza sharëse përpara Zotit.
¹² Por këta, si shtazë të egra, të lindura prej natyre për gjah dhe shfarosje, shajnë gjëra që nuk i marrin vesh. Ashtu si shtazët, edhe këta do shfarosen.
¹³ Me vuajtje do ta marrin shpërblimin për paudhësitë që kanë bërë. Ata mendojnë se është kënaqësi ta kalosh ditën në qejfe të tepruara. Ata janë njolla e vurrata, që dëfrehen me mashtrimet e tyre, duke ngrënë e duke pirë bashkë me ju.
¹⁴ Sytë i kanë të ndezur me tradhti bashkëshortore, nuk pushojnë së mëkatuari, joshin shpirtra të paqëndrueshëm, zemrën e kanë të stërvitur në pangopësi – janë bij mallkimi.
¹⁵ Kanë braktisur rrugën e drejtë dhe gabuan, duke ndjekur rrugën e Balaamit, birit të Beorit, i cili deshi pagën e paudhësisë,
¹⁶ por u qortua për shkeljen e vet; një gomare pa gojë, që foli me zë njeriu, e ndaloi marrëzinë e profetit.
¹⁷ Këta janë burime pa ujë, mjegulla që i shtyn stuhia, për të cilët është ruajtur terri i errësirës.
¹⁸ Sepse duke folur me fjalë të fryra e të zbrazëta, ata joshin me anë të epsheve të mishit, me anë të shthurjes, ata që sapo kanë shpëtuar prej atyre që jetojnë në rrugë të gabuar.
¹⁹ U premtojnë atyre liri, kur vetë ata janë skllevër të shthurjes, sepse njeriu bëhet skllav i asaj që e ka mposhtur.
²⁰ Sepse, nëse u kanë shpëtuar fëlliqësive të botës me anë të njohjes së Zotit [tonë] dhe Shpëtimtarit Jezus Krisht dhe përsëri janë ngatërruar në to dhe janë mposhtur prej tyre, atëherë kjo gjendje e tyre e fundit është bërë më e keqe se e para.
²¹ Do të ishte më mirë për ta që të mos e kishin njohur rrugën e drejtësisë, sesa duke qenë në dijeni, të largohen nga urdhërimi i shenjtë që iu dha.
²² U ndodhi siç thotë fjala e urtë e vërtetë: "Qeni kthehet tek e vjella e vet" dhe "Dosa, pasi është larë, shkon e zhgërryhet në llucë."