kap 1
kap 2
kap 3

2 Pjetri

^1
1 Simon Pjetri, shërbëtor dhe apostull i Jezus Krishtit, atyre që nëpërmjet drejtësisë së Perëndisë sonë dhe Shpëtimtarit Jezus Krisht kanë marrë një besim po aq të çmuar sa besimi ynë:
² Ju qoftë dhënë me begati hiri dhe paqja nëpërmjet njohjes së Perëndisë dhe të Jezusit Zotit tonë.
³ Fuqia e Tij hyjnore na ka dhuruar gjithçka që ka të bëjë me jetën dhe përshpirtshmërinë, nëpërmjet njohjes së Atij që na ka thirrur me lavdinë dhe virtytin e Vet.
⁴ Me këto Ai na ka dhënë premtime të çmuara dhe të madhërishme, që nëpërmjet këtyre të bëheni pjesëtarë të një natyre hyjnore, dhe t’i shpëtoni prishjes që i vjen botës prej epshit.
⁵ Po për këtë arsye, bëni çdo përpjekje që t’i shtoni besimit tuaj virtytin dhe virtytit njohjen,
⁶ njohjes vetëkontrollin, vetëkontrollit ngulmimin, ngulmimit përshpirtshmërinë,
⁷ përshpirtshmërisë mirëdashjen vëllazërore dhe mirëdashjes vëllazërore dashurinë.
⁸ Sepse nëse këto gjenden me begati në mes jush, ato nuk ju bëjnë as të padobishëm, as të pafryt në njohjen e Zotit tonë Jezus Krishtit.
⁹ Sepse ai që i mungojnë këto, është i verbër e dritëshkurtër, që ka harruar pastrimin nga mëkatet e tij të vjetra.
¹⁰ Prandaj, vëllezër, përpiquni edhe më shumë të siguroheni për thirrjen dhe zgjedhjen tuaj, sepse për sa kohë i zbatoni këto, kurrë nuk do të rrëzoheni
¹¹ dhe kështu do t’ju hapet gjerësisht hyrja në mbretërinë e përjetshme të Zotit tonë dhe Shpëtimtarit Jezus Krisht.
¹² Prandaj, do t’jua kujtoj gjithmonë këto gjëra, edhe pse i dini dhe e ndieni veten të fortë në të vërtetën që keni tani.
¹³ Por e quaj me vend, për sa kohë që jam në këtë tendë tokësore, t’jua freskoj kujtesën,
¹⁴ sepse e di se së shpejti do të largohem nga kjo tendë, siç ma ka bërë të qartë edhe Zoti ynë Jezus Krisht.
¹⁵ Do të bëj çdo përpjekje që edhe pas largimit tim të mund t’i kujtoni këto gjëra.
¹⁶ Sepse nuk jua bëmë të njohur fuqinë dhe ardhjen e Zotit tonë Jezus Krisht, duke shkuar pas përrallave të sajuara bukur, por u bëmë dëshmitarë duke e parë me sytë tanë madhështinë e Tij.
¹⁷ Sepse kur mori nder dhe lavdi prej Perëndisë Atë, një zë i këtillë i erdhi nga Lavdia e Madhërishme: "Ky është Biri Im i dashur, tek i cili gjej kënaqësi."
¹⁸ Ne vetë e dëgjuam këtë zë që erdhi nga qielli, kur ishim bashkë me Të në malin e shenjtë.
¹⁹ Edhe më të sigurt e kemi bërë fjalën e profetëve dhe ju do të bëni mirë t’i kushtoni vëmendje si një pishtar që ndriçon në një vend të errët, derisa të gdhijë dita dhe ylli i mëngjesit të lindë në zemrën tuaj.
²⁰ Por më parë duhet ta kuptoni se asnjë profeci e Shkrimit nuk vjen nga interpretimi i profetit,
²¹ sepse asnjë profeci nuk ka ardhur ndonjëherë nga vullneti i njeriut, por njerëzit kanë folur prej Perëndisë, të shtyrë nga Fryma e Shenjtë.