kap 1
kap 2
kap 3
kap 4
kap 5

1 Pjetri

^5
1 Prandaj, pleqve që janë midis jush, u bëj thirrje unë, si plak bashkë me ta, si dëshmitar i vuajtjeve të Krishtit dhe si pjesëmarrës i lavdisë që do të zbulohet,
² ruajeni grigjën e Perëndisë që është midis jush, duke e mbikëqyrur jo me pahir, por me dëshirë, sipas vullnetit të Perëndisë, jo me lakmi për para, por me zell për të shërbyer,
³ pa u bërë si zotër mbi ata që ju janë besuar, por duke u bërë shembull për grigjën.
⁴ Kur të shfaqet Kryebariu, ju do të merrni kurorën e lavdisë që nuk fishket kurrë.
⁵ Po ashtu, ju o të rinj, nënshtrojuni më të moshuarve tuaj dhe të gjithë vishuni me përvujtërinë kundrejt njëri-tjetrit, sepse Perëndia është kundër kryelartëve, kurse të përvuajturve u jep hir.
⁶ Përulni veten, pra, nën dorën e fuqishme të Perëndisë, që Ai t’ju lartësojë në kohën e duhur.
⁷ Të gjithë ankthin tuaj hidheni mbi Të, sepse Ai merakoset për ju.
⁸ Të jeni të përkorë dhe syhapur. Kundërshtari juaj, djalli, sillet rrotull si një luan që ulërin, duke kërkuar të gllabërojë ndonjë prej jush.
⁹ Qëndrojini atij të patundur në besimin tuaj, sepse e dini se po ato vuajtje po i kalojnë edhe vëllezërit tuaj në botë.
¹⁰ Pasi të keni vuajtur për pak kohë, Perëndia i gjithë hirit, që ju thirri në lavdinë e Vet të amshuar në Krishtin [Jezus], Ai Vetë do t’ju përsosë, do t’ju bëjë të fortë, të fuqishëm e të patundur.
¹¹ Atij i qoftë pushteti për jetë. Amen.
¹² Ju kam shkruar shkurt, nëpërmjet Silvanit, vëllait besnik, siç e quaj unë, duke ju dhënë zemër dhe duke dëshmuar se ky është hiri i vërtetë i Perëndisë. Të qëndroni të patundur në të!
¹³ Ju përshëndet ajo që është në Babiloni, e zgjedhur bashkë me ju, si edhe Marku, djali im.
¹⁴ Përshëndetni njëri-tjetrin me një puthje dashurie. Paqe të gjithë juve që jeni në Krishtin.