kap 1
kap 2
kap 3
kap 4
kap 5

1 Pjetri

^4
1 Prandaj, meqë Krishti vuajti në mish, edhe ju armatosuni me të njëjtën mendje, sepse ai që ka vuajtur në mish, ka pushuar së mëkatuari,
² që pjesën tjetër të jetës që i ka mbetur për ta jetuar në mish, të mos e jetojë për t’u shërbyer epsheve të njerëzve, por vullnetit të Perëndisë.
³ Sepse kohën që shkoi, ju e keni kaluar duke kënaqur dëshirat e paganëve, duke jetuar në shthurje, epshe, dehje, ahengje, të pira e idhujtari të neveritshme.
⁴ Ata çuditen se si ju nuk zhyteni bashkë me ta në të njëjtin vërshim shthurjeje dhe ju përgojojnë.
⁵ Ata do t’i japin llogari Atij që është gati të gjykojë të gjallët dhe të vdekurit.
⁶ Sepse për këtë iu predikua ungjilli edhe atyre që tani kanë vdekur që, edhe pse janë gjykuar në mish si njerëz, të jetojnë në frymë sipas Perëndisë.
⁷ Fundi i të gjitha gjërave është afër. Prandaj të jeni të matur dhe të përkorë për t’iu kushtuar lutjeve.
⁸ Mbi të gjitha, të keni dashuri të zjarrtë për njëri-tjetrin, sepse dashuria mbulon një mori mëkatesh.
⁹ Të jeni mikpritës me njëri-tjetrin pa u ankuar.
¹⁰ Secili të përdorë dhuntinë që ka marrë, duke e vënë në shërbim të njëri-tjetrit, si mbarështues të mirë të hirit të larmishëm të Perëndisë.
¹¹ Nëse dikush flet, le të flasë si të ishin fjalë Perëndie. Nëse dikush shërben, le ta bëjë si prej fuqisë që siguron Perëndia, që Perëndia të marrë lavdi në gjithçka nëpërmjet Jezus Krishtit. Atij i qoftë lavdia dhe pushteti për jetë të jetëve. Amen.
¹² Të dashurit e mi, mos u çuditni për sprovën përvëluese që vuani, si t’ju kishte ndodhur diçka e habitshme,
¹³ por gëzohuni që merrni pjesë në vuajtjet e Krishtit; që të mbusheni me gëzim e të ngazëlloheni kur të zbulohet lavdia e Tij.
¹⁴ Nëse ju fyejnë për shkak të emrit të Krishtit, jeni të bekuar, sepse Fryma e lavdisë dhe e Perëndisë pushon mbi ju.
¹⁵ Sepse asnjë prej jush nuk duhet të vuajë si vrasës, vjedhës, keqbërës, apo si ngatërrestar.
¹⁶ Megjithatë, nëse dikush vuan si i krishterë, të mos turpërohet, por të përlëvdojë Perëndinë për këtë emër.
¹⁷ Sepse ka ardhur koha që gjykimi të fillojë nga shtëpia e Perëndisë dhe nëse fillon së pari nga ne, si do të jetë përfundimi i atyre që nuk i binden ungjillit të Perëndisë?
¹⁸ Nëse është e vështirë për të drejtin të shpëtojë, ç’do të bëhet me atë që është i papërshpirtshëm dhe mëkatar?
¹⁹ Prandaj, edhe ata që vuajnë sipas vullnetit të Perëndisë, le t’ia besojnë shpirtrat e tyre një Krijuesi besnik dhe të vazhdojnë të bëjnë mirë.