kap 1
kap 2
kap 3
kap 4
kap 5

1 Pjetri

^3
1 Po ashtu edhe ju gra, nënshtrojuni burrave tuaj, që edhe sikur ndonjë prej tyre të mos i binden fjalës, të fitohen pa fjalë nëpërmjet sjelljes së grave të tyre,
² kur të shohin se ju jetoni me pastërti dhe me frikë ndaj Perëndisë.
³ Stolia juaj të mos jetë vetëm e jashtme, si flokët të thurur gërsheta, stolitë me ar apo veshjet të bukura,
⁴ por të jetë në brendësi të zemrës suaj, të jetë stoli e pavenitshme e një shpirti të butë e të qetë, që është shumë e vyer përpara Perëndisë.
⁵ Sepse kështu e stolisnin dikur veten e tyre edhe gratë e shenjta, që shpresonin në Perëndinë, duke iu nënshtruar burrave të tyre.
⁶ Po kështu iu bind edhe Sara Abrahamit, duke e quajtur atë zot. Ju bëheni bijat e saj, po të bëni atë që është e drejtë dhe po të mos i trembeni asnjë kërcënimi.
⁷ Edhe ju burra, po ashtu, jetoni së bashku me gratë tuaja me mirëkuptim dhe nderojini si një enë më e dobët, meqë është femër, dhe si bashkëtrashëgimtare e hirit të jetës, që lutjet tuaja të mos pengohen nga asgjë.
⁸ Dhe së fundi, të gjithë të jeni në një mendje, të dhembshur, vëlladashës, plot me keqardhje e të përvuajtur.
⁹ Mos e ktheni të keqen me të keqe, ose fyerjen me fyerje, por përkundrazi bekoni, sepse për këtë jeni thirrur, që të trashëgoni bekimin.
¹⁰ Sepse: "Cilido që e do jetën dhe dëshiron të shohë ditë të mira, duhet t’i vërë fre gjuhës për të mos folur keq dhe të mos i lërë buzët të flasin mashtrim.
¹¹ Duhet të largohet nga e liga dhe të bëjë mirë; duhet të kërkojë paqe dhe ta ndjekë atë.
¹² Sepse Zoti i mban sytë te të drejtët, veshët te lutja e tyre, por Zoti është kundër atyre që bëjnë të këqija."
¹³ Kush është ai që ju bën keq, po të tregoheni të zellshëm për të mirën?
¹⁴ Por edhe sikur të vuani për hir të drejtësisë, të bekuar jeni. Mos iu trembni kërcënimeve të tyre dhe mos u tronditni.
¹⁵ Por të shenjtë ta mbani Krishtin si Zot në zemrat tuaja, duke qenë gjithmonë të gatshëm për t’i dhënë përgjigje kujdo që ju kërkon shpjegime për shpresën që është në ju.
¹⁶ Por këtë ta bëni me butësi dhe respekt. Ndërgjegjen ta keni të pastër, që ata që ju fyejnë për sjelljen tuaj të mirë në Krishtin, të turpërohen që shpifin kundër jush.
¹⁷ Sepse është më mirë për ju të vuani duke bërë mirë, nëse ky është vullneti i Perëndisë, sesa duke bërë keq.
¹⁸ Sepse edhe Krishti vdiq një herë e përgjithmonë për mëkatet, i drejti për të padrejtët, që Ai t’ju sillte te Perëndia; Ai vdiq në mish, por u ngjall në frymë,
¹⁹ me anë të të cilit Ai shkoi e u predikoi shpirtrave në burg,
²⁰ që dikur kishin qenë të pabindur, kur Perëndia i priste me durim në ditët e Noes, gjatë ndërtimit të arkës. Vetëm pak njerëz, tetë veta gjithsej, shpëtuan nga uji.
²¹ Ky ujë simbolizon pagëzimin, që tani ju shpëton ju – dhe nuk është heqje e papastërtisë së trupit, por thirrje drejtuar Perëndisë për një ndërgjegje të pastër – nëpërmjet ngjalljes së Jezus Krishtit,
²² i cili është në të djathtë të Perëndisë, pasi u ngjit në qiell, ku Atij iu nënshtruan engjëjt, pushtetet dhe fuqitë.