kap 1
kap 2
kap 3
kap 4
kap 5

1 Pjetri

^2
1 Prandaj, duke lënë mënjanë çdo ligësi, çdo mashtrim, hipokrizi, smirë e shpifje të çdo lloji,
² dëshironi si foshnja të sapolindura qumështin e pastër të fjalës, që me anë të tij të rriteni për shpëtimin tuaj,
³ tani që keni shijuar mirësinë e Zotit.
⁴ Duke iu afruar Atij, gurit të gjallë, që u hodh poshtë nga njerëzit, por u zgjodh dhe u çmua prej Perëndisë,
⁵ edhe ju, si gurë të gjallë, po ndërtoheni si një shtëpi shpirtërore për një priftëri të shenjtë, për të bërë flijime shpirtërore të pranueshme për Perëndinë nëpërmjet Jezus Krishtit.
⁶ Prandaj thuhet në Shkrim: "Ja, po vë në Sion një gur të zgjedhur, një gur themeli të çmuar dhe ai që beson në Atë, nuk do të turpërohet kurrë."
⁷ Ai është i çmueshëm pra, për ju, që besoni. Por për ata që nuk besojnë: "Guri, të cilin e hodhën poshtë ndërtuesit, u bë guri i këndit"
⁸ dhe "gur që i bën njerëzit të pengohen dhe shkëmb që i bën ata të rrëzohen." Ata pengohen sepse janë të pabindur ndaj fjalës, për të cilën edhe ishin caktuar.
⁹ Por ju jeni një fis i zgjedhur, një priftëri mbretërore, një komb i shenjtë, një popull që i përket Perëndisë, që të shpallni virtytet e shkëlqyera të Atij që ju thirri nga errësira në dritën e Vet të mrekullueshme.
¹⁰ Dikur nuk ishit popull, por tani ju jeni popull i Perëndisë; dikur ju nuk u mëshiruat, por tani gëzoni mëshirë.
¹¹ Të dashurit e mi, ju këshilloj, si të huaj e si të ardhur, të hiqni dorë nga pasionet e mishit, të cilat bëjnë luftë kundër shpirtit.
¹² Silluni mirë midis paganëve, që megjithëse ju përflasin si keqbërës, të shohin veprat tuaja të mira dhe t’i japin lavdi Perëndisë në ditën e ardhjes së Tij.
¹³ Nënshtrojuni për hir të Zotit çdo autoriteti njerëzor, qoftë mbretit, si më i larti,
¹⁴ apo qeveritarëve, që dërgohen prej tij për të ndëshkuar keqbërësit dhe për të lëvduar bamirësit.
¹⁵ Sepse i tillë është vullneti i Perëndisë, që, duke bërë mirë, të mund t’i mbyllni gojën padijes së njerëzve të marrë.
¹⁶ Jetoni si njerëz të lirë, por mos e përdorni lirinë si veshje për të keqen, por jetoni si shërbëtorë të Perëndisë.
¹⁷ Të gjithë t’i nderoni, vëllazërinë e besimtarëve ta doni, Perëndinë ta keni frikë, mbretin ta nderoni.
¹⁸ Shërbëtorë, nënshtrojuni me plot frikë zotërinjve tuaj, jo vetëm atyre që janë të mirë dhe të butë, por edhe atyre që janë të ashpër.
¹⁹ Sepse është e lëvdueshme kur dikush duron hidhërime duke vuajtur padrejtësisht dhe këtë e bën sepse është i ndërgjegjshëm ndaj Perëndisë.
²⁰ Sepse ku është lavdia, nëse duroni kur ju rrahin për mëkatin që keni bërë? Por nëse vuani kur bëni mirë dhe duroni, kjo është për t’u lëvduar para Perëndisë.
²¹ Për këtë jeni thirrur, sepse edhe Krishti vuajti për ju, duke ju lënë një shembull që të ecni pas gjurmëve të Tij.
²² Ai nuk bëri mëkat, as nuk u gjet mashtrim në gojën e Tij.
²³ Kur e fyenin, nuk ua kthente me fyerje; kur vuante, nuk bënte kërcënime, por ia besonte veten Atij që gjykon në mënyrë të drejtë.
²⁴ Ai Vetë i barti mëkatet tona në trupin e Vet në drurin e kryqit, që ne të vdisnim ndaj mëkateve, dhe të jetonim për drejtësinë; prej plagëve të Tij u shëruat ju.
²⁵ Sepse ju ishit si dele që kanë humbur, por tani jeni kthyer te Bariu dhe Ruajtësi i shpirtrave tuaj.