kap 1
kap 2
kap 3
kap 4
kap 5

1 Pjetri

^1
1 Pjetri, apostull i Jezus Krishtit, atyre që banojnë si të huaj, të shpërndarë nëpër Pont, Galaci, Kapadoki, Azi dhe Bitini, të zgjedhurve
² sipas paranjohjes nga Perëndia Atë, nëpërmjet punës shenjtëruese të Frymës, për t’iu bindur Jezus Krishtit dhe për t’u spërkatur me gjakun e Tij: Hiri dhe paqja qoftë me begati për ju.
³ I bekuar qoftë Perëndia dhe Ati i Zotit tonë Jezus Krisht, i cili me mëshirën e Vet të madhe na ka bërë të lindim sërish me një shpresë të gjallë nëpërmjet ngjalljes së Jezus Krishtit nga të vdekurit,
⁴ për një trashëgimi që nuk mund të prishet, nuk mund të përlyhet dhe as të kalbet – të ruajtur në qiej për ju,
⁵ të cilët mbroheni nëpërmjet besimit nga fuqia e Perëndisë për shpëtimin që është gati për t’u zbuluar në mbarim të kohëve.
⁶ Për këtë gëzohuni, megjithëse tani, po të jetë nevoja, për pak kohë mund të trishtoheni nga sprova të ndryshme,
⁷ të cilat kanë ndodhur që besimi juaj, që është shumë më i çmuar se ari që prishet edhe pse ka kaluar provën e zjarrit, të dalë për lëvdatë, lavdi e nder kur të zbulohet Jezus Krishti,
⁸ të cilin, megjithëse nuk e keni parë, e doni. Edhe pse tani nuk e shihni, por besoni në Të, mbusheni me një gëzim të papërshkrueshëm dhe plot me lavdi,
⁹ sepse arrini qëllimin e besimit tuaj, shpëtimin e shpirtrave tuaj.
¹⁰ Për këtë shpëtim, profetët, që profetizuan për hirin që do t’ju vinte, bënë kërkime dhe hetime me imtësi
¹¹ dhe u përpoqën të dinin kohën dhe rrethanat që po tregonte Fryma e Krishtit që ishte ndër ta, kur parashikonte vuajtjet e Krishtit dhe lavditë që do të vinin më pas.
¹² Perëndia u zbuloi atyre se ata nuk po i shërbenin vetes së tyre, por juve, kur ju folën për ato gjëra që ju janë shpallur tani nëpërmjet atyre që predikuan ungjillin te ju me anë të Frymës së Shenjtë që u dërgua nga qielli, gjëra të cilat edhe engjëjt dëshirohen t’i sodisin.
¹³ Prandaj, mblidheni mendjen, qëndroni esëll, varini të gjitha shpresat në hirin që do t’ju jepet kur të zbulohet Jezus Krishti.
¹⁴ Si fëmijë të bindur, mos shkoni pas dëshirave që keni pasur më parë kur ishit të paditur,
¹⁵ por, ashtu si Ai që ju thirri është i shenjtë, edhe ju vetë të jeni të shenjtë në çdo sjellje tuajën.
¹⁶ Sepse është shkruar: "Të jeni të shenjtë, sepse Unë jam i shenjtë."
¹⁷ Dhe po t’i drejtoheni si Atë Atij që gjykon në mënyrë të paanshme sipas veprës së secilit, kohën e shtegtimit tuaj mbi tokë ta kaloni me frikë,
¹⁸ duke e ditur se shpengimi që ju çliroi nga mënyra juaj e kotë e jetesës që keni trashëguar nga etërit tuaj nuk u bë me gjëra që prishen si argjendi ose ari,
¹⁹ por me gjakun e çmuar të Krishtit, si të një qengji pa cen e të panjollë.
²⁰ Ai vërtet ka qenë njohur që përpara themelimit të botës, por u shfaq në kohët e fundit për hirin tuaj.
²¹ Nëpërmjet Tij ju besoni në Perëndinë, që e ngjalli Atë prej të vdekurve dhe i dha lavdi, që besimi juaj dhe shpresa të jenë te Perëndia.
²² Tani që keni pastruar shpritrat tuaj duke iu bindur të vërtetës për një dashuri vëllazërore të pashtirur, duajeni fort njëri-tjetrin me zemër [të pastër],
²³ sepse jeni lindur përsëri jo prej farës që prishet, por prej asaj që nuk prishet, nëpërmjet fjalës së Perëndisë që është i gjallë dhe që mbetet për jetë.
²⁴ Sepse "I gjithë mishi është si bari dhe e gjithë lavdia e tij është si lulja e barit. Bari fishket dhe lulja bie,
²⁵ por fjala e Zotit mbetet përgjithmonë." Kjo është fjala që ju është predikuar juve.