7
¹ Mos gjykoni që të mos gjykoheni.
² Sepse me atë gjykim që gjykoni të tjerët, do të gjykoheni, dhe me atë masë që matni, me atë do t’ju matin.
³ Përse shikon lëmishtën në syrin e vëllait, por nuk vë re traun që ke në syrin tënd?
⁴ Ose si do t’i thuash vëllait tënd: ‘Më lër të nxjerr lëmishtën nga syri yt’, kur ke traun në syrin tënd?
⁵ Ti hipokrit, hiq më parë traun nga syri yt dhe atëherë do të shohësh më qartë, që të nxjerrësh lëmishtën nga syri i vëllait tënd.
⁶ Mos ua jepni qenve atë që është e shenjtë, as mos ua hidhni derrave margaritarët tuaj, se mos i shkelin me këmbë dhe kthehen nga ju e ju shqyejnë.
⁷ Lypni dhe do t’ju jepet; kërkoni dhe do të gjeni; trokisni dhe do t’jua hapin,
⁸ sepse kushdo që lyp, merr, dhe ai që kërkon, gjen, dhe atij që troket, do t’ia hapin.
⁹ Ose, cili prej jush, po t’i kërkojë i biri bukë, do t’i japë gur?
¹⁰ Ose, po t’i kërkojë peshk, mos vallë do t’i japë gjarpër?
¹¹ Kur ju pra, që jeni të ligj, dini t’u jepni fëmijëve tuaj dhurata të mira, sa më tepër Ati juaj që është në qiej, do t’u japë gjëra të mira atyre që i kërkojnë Atij.
¹² Pra, çfarëdo që do të donit t’ju bëjnë njerëzit juve, po kështu bëjuani edhe ju atyre, sepse ky është Ligji dhe Profetët.
¹³ Hyni nga porta e ngushtë; sepse e madhe është porta dhe e gjerë është rruga që çon në rrënim, dhe të shumtë janë ata që hyjnë nëpër të;
¹⁴ sepse e vogël është porta dhe e ngushtë është rruga që të shpie te jeta, dhe të paktë janë ata që e gjejnë atë.
¹⁵ Ruhuni nga profetët e rremë, që vijnë te ju veshur me lëkurë deleje, por që përbrenda janë ujq grabitqarë.
¹⁶ Ata do t’i njihni nga frytet e tyre. A mund të vilet rrush nga drizat ose fiq nga gjembaçët?
¹⁷ Kështu, çdo pemë e mirë jep fryte të mira, por çdo pemë e kalbur jep fryte të këqija.
¹⁸ Pema e mirë nuk mund të japë fryte të këqija, as pema e kalbur nuk mund të japë fryte të mira.
¹⁹ Çdo pemë, që nuk jep fryt të mirë, pritet dhe flaket në zjarr.
²⁰ Pra, nga frytet e tyre do t’i njihni ata.
²¹ Jo çdo njeri që më thotë: ‘Zot, Zot’, do të hyjë në mbretërinë e qiejve, por ai që bën vullnetin e Atit Tim që është në qiej.
²² Shumë do të më thonë në atë ditë: ‘Zot, Zot, a nuk kemi profetizuar në emrin Tënd? A nuk kemi dëbuar demonë në emrin tënd? A nuk bëmë shumë mrekulli në emrin Tënd?
²³ E atëherë do t’u them hapur: ‘Unë s’ju kam njohur kurrë, largohuni prej Meje, ju që keni bërë paudhësi.’
²⁴ Prandaj, kushdo që i dëgjon këto fjalë të Mia, dhe i vë ato në jetë, do t’i ngjajë njeriut të mençur që e ndërtoi shtëpinë e vet mbi shkëmb.
²⁵ Ra shiu, vërshuan lumenjtë e frynë erërat dhe u përplasën mbi atë shtëpi; por ajo nuk u shemb, sepse i kishte themelet mbi shkëmb.
²⁶ Kushdo që i dëgjon këto fjalë të Mia dhe nuk i vë ato në jetë, do t’i ngjajë njeriut pa mend që e ndërtoi shtëpinë e vet mbi rërë.
²⁷ Ra shiu, vërshuan lumenjtë e frynë erërat dhe u përplasën mbi atë shtëpi; ajo u rrëzua e rrënimi i saj qe i madh."
²⁸ Dhe kur Jezusi u kishte dhënë fund këtyre fjalëve, turmat mbetën të mrekulluara nga mësimi i Tij,
²⁹ sepse Ai i mësonte ata si një njeri me autoritet të plotë dhe jo si skribët e tyre.