kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^5
1 Kur pa turmat, Ai u ngjit në mal, dhe si u ul, iu afruan dishepujt e Vet.
² Filloi t’i mësonte duke thënë:
³ "Lum ata që janë të varfër në shpirt, sepse e tyrja është mbretëria e qiejve.
⁴ Lum ata që vajtojnë, sepse ata do të ngushëllohen.
⁵ Lum ata që janë zemërbutë, sepse ata do të trashëgojnë tokën.
⁶ Lum ata që janë të uritur dhe të etur për drejtësi, sepse ata do të nginjen.
⁷ Lum të mëshirshmit, sepse ndaj tyre do të tregohet mëshirë.
⁸ Lum ata me zemër të pastër, sepse ata do ta shohin Perëndinë.
⁹ Lum ata që punojnë për paqen, sepse ata do të thirren bij të Perëndisë.
¹⁰ Lum ata që janë përndjekur për shkak të drejtësisë, sepse e tyre është mbretëria e qiejve.
¹¹ Të lumët ju kur t’ju shajnë e t’ju përndjekin dhe, duke gënjyer, të thonë të gjitha të këqijat kundër jush për shkakun Tim.
¹² Gëzohuni dhe ngazëllohuni, sepse i madh është shpërblimi juaj në qiej, sepse kështu i përndoqën edhe profetët që kanë qenë përpara jush.
¹³ Ju jeni kripa e tokës, por nëse kripa amështohet, me çfarë do të njelmësohet? Nuk vlen më për asgjë veç për t’u hedhur jashtë e për t’u shkelur nga njerëzit.
¹⁴ Ju jeni drita e botës. Nuk mund të fshihet qyteti që është në majë të malit.
¹⁵ As kandilin nuk e ndezin dhe nuk e vënë nën karroqe, por e vendosin në shandan, që t’u bëjë dritë të gjithëve që janë në shtëpi.
¹⁶ Kështu, le të shndritë drita juaj përpara njerëzisë, që ata të mund të shohin veprat tuaja të mira dhe t’i thurin lavdi Atit tuaj që është në qiej.
¹⁷ Mos mendoni se kam ardhur që të shfuqizoj Ligjin ose Profetët; nuk kam ardhur për t’i shfuqizuar, por për t’i plotësuar.
¹⁸ Sepse me të vërtetë po ju them, sa të jetë qielli dhe toka, asnjë shkronjë dhe asnjë presje nuk do t’i hiqet Ligjit, derisa të përmbushen të gjitha.
¹⁹ Pra, kushdo që të shkelë edhe më të voglën prej këtyre porosive dhe t’i mësojë njerëzit të veprojnë ashtu, do të quhet më i vogli në mbretërinë e qiejve; por kushdo që i zbaton ato porosi dhe ua mëson të tjerëve, ky do të quhet i madh në mbretërinë e qiejve.
²⁰ Sepse po ju them që, nëse drejtësia juaj nuk ia kalon asaj të skribëve dhe të farizenjve, nuk do të hyni në mbretërinë e qiejve.
²¹ E keni dëgjuar ç’kanë thënë më të vjetrit: ‘Nuk do të vrasësh; kushdo që do të vrasë, do t’i nënshtrohet gjykimit.’
²² Por po ju them që kushdo që zemërohet me vëllanë e vet, do të përgjigjet para gjyqit, dhe kushdo që i thotë vëllait të vet ‘raka’, do të jetë fajtor para këshillit të lartë, dhe kushdo që i thotë ‘i marrë’, do t’i nënshtrohet ferrit të zjarrtë.
²³ Prandaj, nëse e sjell dhuratën tënde në altar dhe atje kujtohesh që yt vëlla ka diçka kundër teje,
²⁴ lëre aty dhuratën para altarit. Shko më parë të pajtohesh me vëllanë tënd dhe pastaj eja të sjellësh dhuratën.
²⁵ Ndaje sa më shpejt sherrin me kundërshtarin tënd që kur je rrugës me të, se mos kundërshtari të dorëzon te gjykatësi dhe gjykatësi te roja dhe të flakin në burg.
²⁶ Me të vërtetë po ta them, se kurrë nuk ke për të dalë prej andej, pa paguar më parë edhe qindarkën e fundit.
²⁷ Keni dëgjuar që është thënë: ‘Mos e shkel kurorën’,
²⁸ por Unë po ju them, që kushdo që e shikon me lakmi gruan e tjetrit, ka shkelur tashmë kurorën me të në zemrën e vet.
²⁹ Nëse syri yt i djathtë të shtyn në mëkat, nxirre dhe flake tej, sepse është më mirë që të humbasësh një pjesë të trupit tënd, sesa të të hidhet i gjithë trupi në skëterrë.
³⁰ Nëse dora e djathtë të shtyn në mëkat, preje dhe flake tej, sepse është më mirë që të humbasësh një pjesë të trupit tënd, sesa të të përfundojë i tërë trupi në skëterrë.
³¹ Është thënë që kushdo që lë gruan e vet, duhet t’i japë shkresën e ndarjes.
³² Por po ju them, që çdo njeri që e ndan gruan e vet, me përjashtim të rastit të imoralitetit, e bën atë ta shkelë kurorën, dhe kushdo që martohet me grua të ndarë, shkel kurorën.
³³ Veç kësaj, ju keni dëgjuar që është thënë nga më të vjetrit: ‘Mos bëj be të rreme, por mbaji betimet që bën përpara Zotit.’
³⁴ Por po ju them: mos bëni asnjë lloj beje, as për qiellin, sepse ai është froni i Perëndisë,
³⁵ as për dheun, sepse është stoli për këmbët e Tij, as për Jeruzalemin, sepse është qyteti i Mbretit të madh,
³⁶ as për kokën tënde mos bëj be, sepse nuk mund ta bësh të bardhë ose të zezë as edhe një fije floku të vetme.
³⁷ Por fjala juaj duhet të jetë ‘Po, po’ ose ‘Jo, jo’, sepse çdo gjë më tepër se këto vjen nga i ligu.
³⁸ Ju keni dëgjuar që është thënë, ‘Sy për sy e dhëmb për dhëmb’,
³⁹ por Unë po ju them që të mos i kundërviheni njeriut të lig. Kur dikush të godet në faqen e djathtë, ktheja edhe tjetrën.
⁴⁰ Nëse dikush të hedh në gjyq e të merr këmishën, lërja edhe setrën.
⁴¹ Kur dikush të detyron të ecësh një milje, ti bëj dy bashkë me të.
⁴² Atij që të lyp, jepi, dhe mos i kthe krahët atij që kërkon të marrë hua prej teje.
⁴³ Keni dëgjuar që është thënë: ‘Duaje të afërmin tënd dhe urreje armikun tënd’,
⁴⁴ por Unë po ju them, duajini armiqtë tuaj dhe lutuni për ata që ju përndjekin,
⁴⁵ që të jeni bij të Atit tuaj që është në qiell, që bën diellin e Vet të lindë mbi të ligjtë e të mirët dhe e bën shiun të bjerë mbi të drejtët e të padrejtët.
⁴⁶ Sepse nëse doni ata që ju duan, çfarë shpërblimi do të keni? A nuk bëjnë të njëjtën gjë edhe tagrambledhësit?
⁴⁷ Nëse përshëndesni vetëm vëllezërit tuaj, çfarë po bëni më tepër se të tjerët? A nuk bëjnë të njëjtën gjë edhe paganët?
⁴⁸ Prandaj, të jeni të përsosur, ashtu siç është i përsosur Ati juaj qiellor.