kap 1
kap 2
kap 3
kap 4
kap 5
kap 6
kap 7
kap 8
kap 9
kap 10
kap 11
kap 12
kap 13
kap 14
kap 15
kap 16
kap 17
kap 18
kap 19
kap 20
kap 21
kap 22
kap 23
kap 24
kap 25
kap 26
kap 27
kap 28

Mateu

^4
1 Pastaj Fryma i priu Jezusit për në shkretëtirë për t’u tunduar nga djalli.
² Pasi agjëroi dyzet ditë e dyzet net, Atë e mori uria.
³ Tunduesi iu afrua dhe i tha: "Nëse je Bir i Perëndisë, thuaj që këta gurë të bëhen bukë."
⁴ Por Ai u përgjigj dhe tha: "Është shkruar: ‘Jo vetëm me bukë do të rrojë njeriu, por me çdo fjalë që del nga goja e Perëndisë.’"
⁵ Pastaj djalli e çoi në qytetin e shenjtë dhe e vuri në cep të pullazit të tempullit
⁶ dhe i tha: "Nëse je Bir i Perëndisë, hidhu poshtë, se është shkruar, ‘Do t’i urdhërojë engjëjt e Tij për Ty’ dhe ‘Në krahë do të të mbajnë, që këmba Jote të mos godasë në gur.’"
⁷ Jezusi i tha: "Është shkruar gjithashtu: ‘Mos e vër në provë Zotin, Perëndinë tënd.’"
⁸ Përsëri, djalli e çoi në një mal shumë të lartë dhe i tregoi të gjitha mbretëritë e botës dhe lavdinë e tyre,
⁹ dhe i tha: "Të gjitha këto gjëra do të t’i jap, po të ulesh para meje e të më adhurosh."
¹⁰ Pastaj Jezusi i tha: "M’u hiq sysh, Satan! Sepse është shkruar: ‘Do të adhurosh Zotin Perëndinë tënd dhe vetëm Atij do t’i shërbesh.’"
¹¹ Atëherë djalli e la. Dhe ja tek erdhën engjëjt dhe filluan t’i shërbejnë.
¹² Kur Jezusi dëgjoi që Gjonin e kishin hedhur në burg, u nis për në Galile.
¹³ Dhe, si la prapa Nazaretin, shkoi e u vendos në Kapernaum, qytet pranë detit, në krahinën e Zebulonit e të Neftalimit,
¹⁴ që të përmbushej ajo që ishte thënë nëpërmjet profetit Isaia,
¹⁵ "Tokë e Zebulonit dhe tokë e Neftalimit, nga ana e detit, përtej Jordanit, Galile e kombeve!
¹⁶ Populli, i zhytur në errësirë, pa një dritë të madhe; mbi ata që rrinin në vendin e hijes së vdekjes, agoi një dritë."
¹⁷ Që nga ajo kohë Jezusi filloi të predikonte dhe të thoshte: "Pendohuni, sepse mbretëria e qiellit po afron."
¹⁸ Ndërsa po ecte buzë detit të Galilesë, Ai pa dy vëllezër, Simonin, që e quanin Pjetër, dhe Andrenë, të vëllanë e tij, që po hidhnin rrjetën në det, sepse ishin peshkatarë.
¹⁹ Jezusi u tha: "Ejani pas Meje dhe do t’ju bëj peshkatarë njerëzish."
²⁰ Ata lanë menjëherë rrjetat dhe shkuan pas Tij.
²¹ Duke vazhduar udhën më tutje, Ai pa në një lundër dy vëllezër të tjerë, Jakobin, të birin e Zebedeut, dhe vëllanë e tij Gjonin, së bashku me Zebedeun, atin e tyre, që po përgatisnin rrjetat, dhe i thirri.
²² Ata menjëherë e lanë lundrën dhe atin e tyre dhe shkuan pas Tij.
²³ Jezusi i ra kryq e tërthor gjithë Galilesë, duke mësuar njerëzit ndër sinagogat e tyre, duke predikuar lajmin e mirë të mbretërisë dhe duke shëruar çdo sëmundje e lëngatë në popull.
²⁴ Lajmi për Të u përhap në gjithë Sirinë; i sollën të gjithë të sëmurët që vuanin nga lëngata e dhembje të forta, ata që i kishin mbërthyer demonët, ata me sëmundjen e tokës e ata që ishin të paralizuar, dhe Ai i shëronte.
²⁵ Turma të mëdha njerëzish e ndoqën nga Galileja, Dekapoli, Jeruzalemi, Judeja dhe nga viset përtej Jordanit.